CAVITE – Pinaghahanap ng pulisya ang driver ng isang pulang Mitsubishi Garage na may plakang NBW-5557, matapos layasan ang isang babae na kanyang nasagasaan sa bayan ng Kawit sa lalawigang ito, noong Sabado ng gabi.

Kinilala ang biktimang si Marian Kreitia Ysabelle Ortiz Lacson, nasa hustong edad, nilalapatan ng lunas sa San Pedro Calungsod Hospital.

Nakipag-ugnayan naman ang Kawit Police sa Land Transportation Office (LTO) para sa pagkakakilanlan ng nagmamaneho ng nasabing sasakyan.

Ayon sa ulat, dakong alas-11:45 ng gabi, habang tumatawid ang biktima sa Kalayaan Road, Brgy. Magdalo-Potol, Kawit, Cavite nang masagasaan ito ng suspek.

Gayunman, imbes na tumigil ang driver para saklolohan ang biktima, pinaharurot nito ang sasakyan papalayo sa lugar.

(SIGFRED ADSUARA)