LAGUNA – Nakumpiska ng mga operatiba ng Laguna PNP -PDEU/PSOU at mga tauhan ng Biñan City Police ang P6.9 milyong halaga ng illegal drugs sa buy-bust operation sa Biñan City sa lalawigang ito, nitong Biyernes ng madaling araw.

Arestado ang target sa buy-bust operation na si alyas “Kamal”, nakatala bilang high value individual sa PNP drug watch list.

Isinagawa ang buy-bust operation sa Brgy. Sto. Niño, dakong alas-1:30 ng madaling araw at nakatransaksyon ng isang police poseur buyer ang suspek na dumating sakay ng SUV.

Nakumpiska sa suspek ang isang vacuum sealed transparent plastic na naglalaman ng 1,000 grams ng umano’y shabu na P6,900,000 ang halaga, at ang buy-bust money.

Nakakulong na ang suspek sa Biñan City Police Station locked-up cell at nakatakdang sampahan ng kasong paglabag sa RA 9165 o Comprehensive Dangerous Drugs Act of 2002.

(NILOU DEL CARMEN)