CAVITE – Nabuking ang pandaraya ng dalawang sabungero na natuklasang may inilalabang manok ngunit sa kalaban pumusta, nang mabatid na pinalitan ng tari na walang talim ang kanilang panabong sa Bacoor City sa lalawigang ito, noong Linggo ng hapon.

Nahaharap sa kasong paglabag sa Article 318 (Other Deceits) ng Revised Penal Code, ang mga suspek na sina Ronnie Marito y Del Castillo at Sherwin Remulla y Espiritu, pawang nasa hustong edad, dahil sa reklamo ng pamunuan ng Cavite Coliseum sa Revilla Business Park.

Ayon sa ulat, nangyari ang insidente dakong alas-2:00 ng hapon sa nabanggit na coliseum sa Brgy. Salinas 4, Bacoor City.

Nabatid sa imbestigasyon, inilaban ng mga suspek ang kanilang panabong na manok, gayunman sa kalaban sila pumusta matapos palitan ng tari na walang talim ang kanilang panabong ngunit natuklasan ang kanilang pandaraya kaya sila ipinaaresto.

(SIGFRED ADSUARA)