ARESTADO ang umano’y dalawang bigtime na tulak ng hinihinalang mga drug lord sa loob ng New Bilibid Prison, sa ikinasang buy-bust operation ng mga tauhan ng NCRPO RID-RDEU, PDEG nitong Lunes ng madaling araw sa Pasay City.

Dakong alas-3:00 ng madaling araw nang ikasa ng magkasanib na pwersa ng NCRPO RDEU, PDEG at Pasay City Police Station ang buy-bust operation na nagresulta sa pagkakadakip sa mga suspek na kinilalang sina Darren Decena ng Cuyegkeng ng Pasay City, at Bernadeth Barrientos ng Ampaya Compound, Brgy. Putatan, Muntinlupa City.

Nasamsam kina Decena at Barrientos ang apat na plastic sachet ng tinatayang 50 gramo ng shabu, at isang plastic sachet ziplock type na may shabu na tinatayang P240,000 ang kabuuang halaga, at isang grey Toyota Wigo na may plate number IAB 9931.

Napag-alaman, nakipagtransaksyon ang isang poseur buyer kay Decena at sa kasabwat nitong si Barrientos sa harap ng isang fastfood restaurant sa Blue Bay Walk malapit sa kanto ng EDSA at Roxas Blvd., Brgy. 76, Zone 10, Pasay City noong madaling araw ng Lunes.

Nang magkaabutan ng marked buy-bust money na P2,000 at ng shabu, agad na hinuli ng mga operatiba ang dalawang suspek.

Ayon sa imbestigasyon ng pulisya, konektado si Decena sa mga inmate ng NBP na sina Rafael Alberto at isang alyas “Chen,” Chinese national, na sangkot umano sa malakihang pagtutulak ng ilegal na droga.

Nabatid sa record ng pulisya, si Decena ay dating nadetine sa Pasay City dahil sa kasong paglabag sa RA 9165 o Comprehensive Dangerous Drugs Act of 2002.

Nag-o-operate umano sa ilegal na droga si Decena sa Pasay City at katabing mga siyudad. (DAVE MEDINA)