CAVITE – Patay ang isang 52-anyos na traffic enforcer nang mabangga at magulungan ng isang truck na tinangkang mag-overtake sa Bacoor City noong Miyerkoles ng umaga.

Kinilala ang biktimang si alyas “Obet”, traffic enforcer, ng San Nicolas I, Bacoor City, dead on the spot sa insidente.

Ayon sa ulat, minamaneho ng biktima ang kanyang motorsiklo at binabagtas ang kahabaan ng Molino Boulevard , Molino III, Bacoor City dakong alas-8:20 nang umaga nang masagi siya ng Fuso truck na may plakang CCO 9559 na minamaneho ni alyas “Ronald”, 54, nang tinangka nitong mag-overtake.

Bunsod nito, tumilapon sa kalsada ang biktima mula sa kanyang motorsiklo kaya nagulungan pa sa ulo ng truck na nagresulta sa kanyang agarang kamatayan.

(SIGFRED ADSUARA)