NAGPAPAHIWATIG ng malakas na international support sa Pilipinas ang pagbisita ni US Vice President Kamala Harris.
Pinapurihan ni Camarines Sur 3rd District Rep. Gabriel Bordado Jr. ang pagbisita ng ikalawang pinakamataas na pinuno ng Amerika dahil nagpapadala aniya ito ng malakas na senyales na hindi papayag ang mga bansang kaalyado ng Pilipinas sa pambu-bully ng China.
Sa isang pahayag, pinuri rin ni Bordado sina Pangulong Ferdinand Marcos Jr. at Bise Presidente Sara Duterte sa pagsusulong ng pagpapalakas ng bilateral na kooperasyon sa pagitan ng Pilipinas at Estados Unidos.
Si Harris ang unang pinakamataas na opisyal ng US na bumisita sa Pilipinas mula nang bumisita si dating Pres. Donald Trump noong 2017. Ang mga pagbisita ng matataas na pinuno ay kadalasang ginagamit ng US upang ipakita ang pangako sa pang-ekonomiya, diplomatiko, at pakikipagtulungang militar sa mga kaalyado sa buong mundo.
Noong Martes, bumisita si Harris sa Palawan. Ang Pilipinas at China ay nasa isang matagal nang maritime dispute dahil inaangkin ng Beijing ang halos kabuuan ng South China Sea, na nagsasapawan sa West Philippine Sea.
Nakamit ng Pilipinas ang tagumpay laban sa China sa Permanent Court of Arbitration sa The Hague, Netherlands noong 2016. Idineklara ng arbitration court na ilegal ang paghahabol ng Beijing sa halos buong South China Sea.
“Ang pagbisita ni Bise Presidente Harris ay dapat magpadala ng malakas na senyales sa mga bansang hindi gumagalang sa mga hangganan ng teritoryo at patuloy na binu-bully tayo sa sarili nating karagatan,” sabi ni Bordado.
Sa pagsasalita sakay ng Philippine Coast Guard patrol ship, nanawagan si Harris sa mga bansa na manindigan para sa integridad ng teritoryo at kalayaan sa paglalayag sa South China Sea.
Binanggit niya ang malalim na stake para sa America at sa internasyonal na komunidad sa rehiyon, partikular sa abalang South China Sea at nanawagan ng malawak na pagsisikap na ipaglaban ang walang hadlang na komersiyo at kalayaan sa paglalayag at overflight sa pinagtatalunang karagatan. (JOEL O. AMONGO)
131 
