HINDI na nagawang makadaong pa ng isang barkong may lulang 20,000 sako ng bigas na plano sanang dalhin sa Zamboanga, kamakailan.
Sa pinagsanib na operasyon ng Bureau of Customs- Port of Zamboanga (BOC-POZ) at Philippine Coast Guard (PCG), nasabat sa karagatang sakop ng Tawi-Tawi ang isang sasakyang dagat na una nang itinimbreng may lulang libo-libong sako ng bigas na tinatayang nagkakahalaga ng P15 milyon.
Ayon pa sa BOC, Setyembre 12 pa nang makatanggap ang kanilang tanggapan ng impormasyon hinggil sa paparating na kargamentong ipupuslit sa bansa sa hangaring makaiwas sa mga bayaring itinakda para sa mga produktong inaangkat mula sa ibang bansa.
Bukod sa 20,000 sako ng bigas mula sa Sandakan, Malaysia, kumpiskado rin ang MV Eshan Khan kung saan isinakay ang mga nasabing kargamento. Maging ang 14 na tripulante ng barko, arestado ayon sa kawanihan.
Ayon kay District Collector Segundo Sigmundfreud Barte Jr., hindi magiging tagumpay ang nasabing operasyon laban sa mga smugglers kung wala ang matibay na ugnayan ng iba’t ibang ahensyang magkakatuwang na nagbabantay sa karagatan sa timog ng bansa.
Nasa kustodiya na ng Sub-Port of Bongao ang nakumpiskang barko para sa imbentaryo, habang inihahanda naman ang kaukulang asuntong isasampa sa husgado.
138