ISANG hakbang na lamang at tuluyan nang papasa sa Kamara ang panukalang itaas sa P1,000 ang buwanang pension na natatanggap ng mahihirap na senior citizens sa bansa.
Sinabi ni Senior Citizen party-list Rep. Rodolfo Ordanes na naaprubahan, Martes ng gabi sa second reading sa mababang kapulungan ang isinusulong niyang dagdag P500 sa pension ng mahihirap na nakatatanda.
Tiwala ang mambabatas na kapag umabot sa Senado ang panukala ay agad din itong makalulusot dahil naghain ng kahalintulad na panukala si Senate President Vicente Sotto III.
Aniya kapag naging ganap na batas, higit tatlong milyong senior citizens ang makikinabang dito.
Aminado si Ordanes na maliit na halagang maituturing ang karagdagang P500 para sa maayos na pamumuhay ng nakatatanda, na marami ay hindi na rin magawang kumita dahil sa kanilang edad.
“Ang inyong lingkod na kinatawan ng Senior Citizen party-list ay ilang buwan na buong pusong inilaban ang pagtaas ng social pension ng ating mga senior,” sabi pa ng namumuno sa House special committee on senior citizens.
Nabanggit din ng mambabatas na dahil sa kanyang pagpupursige ay mas napadali ang pagkakaroon ng social pension ng mga nakatatanda.
“Ngayon po, kinakailangan lang na mapatunayan ng isang senior citizen na wala silang permanenteng napagkukunan ng ikabubuhay at magiging kuwalipikado na sila sa social pension,” dagdag pa ni Ordanes.
Kayat, ayon pa sa mambabatas, maaring madagdagan pa ang bilang ng mga pensiyonadong nakatatanda sa bansa dahil sa pinadaling kwalipikasyon. (CESAR BARQUILLA)
69 
