(SAKSI NEWS TEAM)

NAGPAHAYAG ng matinding pangamba ang mga pamunuan ng mga barangay sa Quezon City matapos maganap ang pulong ng mga small town lottery (STL) operator sa Camp Karingal noong Hulyo 21 ng hapon.

Ayon sa impormasyon mula sa mapagkakatiwalaang source, dinaluhan ng mga STL operator ang pulong na idinaos umano sa tanggapan mismo ni Quezon City Police District Director Brig. Gen. Antonio Yarra.

Dahil dito, nag-isip ang pamunuan ng mga Barangay na kailangan palang mayroong “go signal” ng District police ang operasyon ng STL ng Philippine Charity Sweepstakes Office (PCSO) bago ito lumarga sa lungsod.

Ibinunyag pa ng grupo na nadagdagan ang kanilang alalahanin nang malaman nilang walang partisipasyon si Mayor Joy Belmonte dahil wala itong kinatawan sa nasabing pulong.

Ang legal na sistema ay kailangan ng Mayor’s Permit, o Business Permit, na iisyu ng Business Permit and Licensing Office (BPLO), bago magsimula ang isang negosyo tulad ng STL.

Legal ang STL kung hindi “bookies” ang magiging operasyon nito.

Ibig sabihin, hindi ito magiging prente ng jueteng kung saan tatlong bola kada araw ang kamada ng mga jueteng lord.

Kahit na mayroong prangkisa, o lisensyang ibingay ang PCSO, sa isang kumpanya upang makapag-operate ng STL ay kailangan pa ring magkaroon ito ng Mayor’s Permit at iba pang dokumento.

Ang Mayor’s Permit at mga kaugnay na dokumento ay galing sa pamahalaang lungsod, hindi sa QCPD, partikular sa tanggapan ni Yarra.

Kaya, banggit ng source malaking kuwestiyon sa pamunuan ng mga Barangay ang pagpasok ng STL sa lungsod nang walang ugnayan sa pamahalaang lungsod, partikular sa tanggapan ni Mayor Belmonte, lalo pa’t alam naman ng lahat na tahasang tutol ang alkalde sa anomang porma ng sugal.

Idinagdag pa ng mga punong barangay na mayroong Games and Amusement Committee ang Sangguniang Panglungsod na dapat ay iginagalang din ni Yarra at ng mga STL operator.

Hindi porke, mayroong lisensyang galing sa PCSO ay babalewalain at itatago na ni Yarra at ng mga STL operator ang planong magkaroon ng STL sa lungsod.

Direktang inihalimbawa ng mga opisyal ang ipinatawag kamakailan ng BPLO na Lucent Gaming and Entertainment STL na mula umano noong Hulyo 15 ay nag-o-operate na ng tatlong beses sa loob ng isang araw batay na rin sa kanilang Facebook Account, subalit ayon naman sa operator ay dry run lang ito.

Maituturing umanong binalewala ng mga STL operator ang Games and Amusement Committee ng lungsod sa pagdaraos ng tuluy-tuloy na pagbola.

Ipinarating sa SAKSI Ngayon ng mga nababahalang opisyal na isa umanong retiradong pulis ang nangasiwa sa pulong ng mga STL operator na kinilala sa pangalang “Lt. Col. Reynaldo Magdaluyo”.

Batay sa impormasyon, si Magdaluyo ay nakasama ni Yarra sa Manila Police District (MPD) noong aktibo pa sa Philippine National Police (PNP) ang huli.

Si Yarra ay kilalang ‘bataan’ ni General Guillermo Lorenzo Eleazar dahil ang huli mismo ang humirit kay Belmonte na aprubahan ang pagtalaga kay Yarra bilang direktor ng QCPD.

Naganap ito ilang linggo bago maging PNP Chief si Eleazar.

Bukod kay Magdaluyo, lumutang din ang pangalan ng isang “Dex Bautista” bilang isa sa mga nagtutulak ng STL sa lungsod.

Si Bautista ay kamag-anak umano ni dating Mayor Herbert Bautista.

Hindi malaman ng source kung bakit isinama pa si Bautista sa pagpasok ng STL sa Quezon City, samantalang magkakilala naman sina Yarra at Magdaluyo.

Sinikap na makuha ng SAKSI Ngayon ang panig ni Yarra tungkol sa kanyang papel sa pagpasok ng STL sa Quezon City, subalit nabigo sapagkat sa gate pa lamang ng Camp Karingal ay hindi na nagpapasok ang mga bantay na pulis dahil wala umanong appointment, o schedule, kay Yarra.

Maging sa text message ay hindi sumagot si Yarra sa mga tanong ng reporter.