ANTI-TERROR LAW APRUB SA SC Pero pangil binawasan

(JESSE KABEL)

KINATIGAN ng Korte Suprema ang “constitutionality” ng kontrobersyal na Anti-Terror Law, maliban sa dalawang probisyong labis at labag sa kalayaan sa pagpapahayag sa saloobin ng mamamayan.

Sa botong 12-3, ibinasura ng Korte Suprema ang 37 petisyong naglalayong tanggalin ang nasa 30 probisyon sa ilalim ng Republic Act 11479 na nilagdaan ni Pangulong Rodrigo Duterte, buwan ng Hulyo ng nakaraang taon bilang tugon sa suliranin ng estado laban sa mga terorista at komunista.

Sa isang pahayag, nanindigan ang Korte Suprema na higit na kailangan ang nasabing batas nang hindi mayuyurakan ang mga karapatang ginagarantiyahan sa ilalim ng Saligang Batas.

Kabilang sa mga idineklarang “unconstitutional” ang Sections 4 at 25 ng RA 11479 na kapwa inilarawang labis at labag.

“The High Court strikes down for being overboard and violative of freedom of expression the qualifier portion of Section 4 stating that… which are not intended to cause death or serious physical harm to a person, to endanger a person’s life, or to create a serious risk to public safety.”

Para naman sa Section 25, nanindigan ang mga mahistrado laban sa paraan ng pagtatalaga at pagbibigay ng malawak na kapangyarihan sa mga tanggapang nasasaad sa istruktura ng Anti-Terror Council.

Other provisions subject to the more than 30 petitions, the High Court’s PIO announced “are not unconstitutional.”

“The main ponencia (hatol) and the various opinions contain interpretations of some of the provisions declared in these cases as not unconstitutional,” ayon sa kalatas na ipinalabas ng Public Information Office ng Korte Suprema.

Giit ng 37 petisyong inihain sa Korte Suprema, labag sa Saligang Batas ang Anti-Terror Law na anila’y yumuyurak sa 15 pangunahing karapatang nakasaad sa 1984 Constitution. Kabilang na rito ang kalayaan magpahayag ng saloobin, kalayaan sa pamamahayag, angkop na proseso ng pagpapairal ng batas, kalayaan laban sa hindi makatwirang pwersahang pagpasok at pagkumpiska ng mga pag-aari ng mga tao at karapatang bumiyahe.

Pasok din sa mga ipinunto ng mga petisyon ang hindi makatwirang “red-tagging”, paglabag sa karapatang makapaglagak ng piyansa, karapatang manatiling inosente maliban na lang kung napatunayang may sala ng husgado, maging ang pagpiit at pagpapahirap sa mga arestado.

‘Partial victory’

Kaugnay nito, bagaman itinuturing ng isang grupo ng mga mambabatas sa Kamara na ‘initial victory” para sa political at civil rights ng mga Pilipino ang ruling ng SC ay hindi nila isinusuko ang naunang posisyon na unconstitutional ang ATL.

Ayon sa Makabayan bloc sa Kamara, plano pa rin nilang kwestiyunin ang iba pang probisyon sa nasabing batas.

‘We plan to challenge the Supreme Court’s declaration that almost all the other provisions of the law are not unconstitutional,” ayon sa nasabing grupo.

Kabilang na dito ang probisyon na ikulong ang isang pinaghihinalaang terorista sa loob ng 24 araw na walang naisasampang kaso, pag-freeze sa kanilang assets, paghuli at pagkulong sa tao kahit nakapagpiyansa na ito at iba pa.

Ikinatuwa ng Makabayan bloc ang hindi pagsama sa “advocacy, protest, dissent, stoppage of work, industrial or mass action” at iba pang kahalintulad na civil at political rights ng mga Pilipino sa nasabing batas.

“It corrects the erroneous and dangerous view of the law’s proponents that equate activism with terrorism. We welcome the effort by the High Court to protect our civil and political rights from the overreach of such a draconian and dangerous law,” ayon sa grupo ng mambabatas.

“It is also correct for the SC to strike as unconstitutional the supra national provision of the law that allows the Anti Terrorism Council (ATC) to declare individuals and groups as terrorist on the mere say so of foreign entities,” dagdag pa ng mga ito.

“Malinaw sa desisyon ng Kataas-taasang Hukuman na hindi maaaring bansagang terorista ang sinomang civil at political rights ang ipinaglalaban,” pahayag naman ni ACT-CIS party-list Rep. Jocelyn Tulfo. (BERNARD TAGUINOD)

6

Related posts

Leave a Comment