(NI KEVIN COLLANTES)

ILANG lugar sa Metro Manila at ilang karatig na lalawigan ang inaasahang makararanas ng pansamantalang pagkawala ng suplay ng kuryente ngayong linggong.

Sa advisory na ipinalabas ng Manila Electric Company (Meralco), nabatid na dulot ito ng mga maintenance work o pagkukumpuning kanilang isasagawa, mula ngayong Lunes, Agosto 26, hanggang sa Linggo, Setyembre 1.

Kabilang umano sa maaapektuhan ay ilang lugar sa mga lungsod ng Caloocan, Makati, Mandaluyong, Manila, Pasay, Marikina, Pasig, at Quezon, gayundin ang ilang lugar sa mga lalawigan ng Bulacan, Laguna, Rizal at Quezon.

Nabatid na kabilang sa mga aktibidad na isasagawa ng Meralco ay paglalagay ng mga bagong pasilidad, line reconductoring works, preventive maintenance at testing works sa loob ng Meralco substations, paglilipat ng mga pasilidad, pagpapalit at paglilipat ng mga poste, at conversion ng mga pasilidad.

Humihingi naman ng paumanhin ang Meralco sa mga maaapektuhan ng kanilang maintenance activities.

Paliwanag pa nito, layunin ng kanilang mga pagkukumpuni na lalo pang mapaghusay ang ibinibigay na serbisyo sa kanilang mga consumers.