IPINAG-UTOS ni Pangulong Rodrigo Roa Duterte sa Department of Public Works and Highways (DPWH) na kausapin ang mga alkalde kaugnay sa istrukturang nakatayo sa danger zones.
Sa kanyang Talk to the People, Lunes ng gabi, inatasan ni Pangulong Duterte si DPWH Secretary Roger Mercado na silipin ang mga istrakturang nakatayo sa “no-build zones” sa ilang lugar na apektado ng bagyong Odette.
Sinabihan ng Chief Executive si Mercado na kausapin ang local executives para tugunan ang nasabing usapin.
“You need to talk to the mayors pati governors but more importantly is how the mayor would govern his city or municipality kasi sila lang makaturo kung saan ilipat ‘tong mga ‘to,” anito.
“Ang akin kasi I do not want to dismantle or to destroy houses unless there is a relocation site …kasi ito ‘yung mga nowhere to go,” dagdag na pahayag nito.
Pagkaraan iniutos ni Pangulong Duterte sa Department of Environment and Natural Resources (DENR) at Department of Agrarian Reform (DAR) na ibigay ang “idle government lands” sa mga Pilipinong na-displaced ng bagyong “Odette”.
Binigyang direktiba ni Pangulong Duterte si DENR Undersecretary Benny Antiporda.
Tiniyak naman ni Antiporda na mare-relocate ang mga residente malapit sa kanilang dating tinitirhan. (CHRISTIAN DALE)
106 
