‘PANGGIGIPIT’ NG DOH SINOPLA NI DEFENSOR

SA halip makatulong ngayong panahon ng pandemya ay nanggigipit pa ang Department of Health (DOH).

Ito ang banat ni Anakalusugan party-list Rep. Mike Defensor sa nasabing ahensya at sa Food and Drug Administration (FDA) matapos balaan ng DOH ang publiko na maaaring kasuhan ang mga ito dahil sa “dispensing” ng Ivermectin bilang lunas sa COVID-19.

Sa pahayag ni Health Undersecretary Maria Rosario Vergeire, ang distribusyon at pagbebenta ng nasabing gamot ay paglabag sa Republic Act (RA) No. 9711 or the Food and Drug Administration (FDA) Act of 2009.

Pinalagan naman ito ni Defensor.

Sa Facebook page ng kinatawan ng Anakalusugan, nag-post ito ng: “Grabe talaga! Hindi na nga nakakatulong ginigipit pa ang IVERMECTIN na gamot na maaring makatulong sa ating mga kababayan. Eh kung kayo kaya DOH at FDA ang kasuhan ko for RECKLESS IMPRUDENCE

RESULTING TO HOMICIDE FOR THE 13,817 COVID DEATHS!”

Nauna nang inihayag ng mambabatas na pinayagan na ng Food and Drug Administration (FDA) ang produksyon ng Ivermectin, kaya legal na ito at walang dahilan para ipagbawal sa mga pasyenteng may COVID-19 at bilang proteksyon sa nasabing virus.

Kasabay ito ng anunsyo ng mambabatas na mamimigay siya ng libreng Ivermectin sa mamamayan ng Quezon City na isa sa may pinakamataas na kaso sa National Capital Region (NCR).

“Pinayagan na ng FDA to produce so legally allowed siya,” ani Defensor sa mga mamamahayag sa Kamara.

“Yung FDA approval is to register your brand. Parang sa rubber shoes – Adidas. Pero Ivermectin is not hard to make. Even YouTube has a video on it,” ayon pa kay Defensor.

Isa si Defensor sa mga masugid na nagtutulak sa nasabing gamot dahil kabilang siya sa mga uminom na nito noong tamaan siya ng COVID-19.

Aniya bukod sa malaking posibilidad na nakagagamot sa nasabing sakit ay mura ang Ivermectin kaysa ibang inirereseta sa kasalukuyan.

59

Related posts

Leave a Comment