HULI man daw at magaling, maihahabol pa rin. Ito mismo ang buod sa iginawad na natatanging parangal ng Association for Philippines-China Understanding (APCU) at ng China Embassy sa yumaong Philippine Ambassador to China na si Jose Santiago “Chito” Sta. Romana.
Sa ginanap na APCU 2022 Award na dinaluhan ni incoming President Ferdinand Marcos Jr. at ng kanyang maybahay na si Liza Araneta-Marcos, 11 ang binigyang pagkilala batay sa kontribusyon sa pagsusulong ng ugnayan sa pagitan ng mga bansang Tsina at Pilipinas.
Iginawad kay Sto. Romana ang pinakamataas na pagkilala – ang Gawad Sultan Paduka Pahala, habang itinanghal namang Hall of Famer sina dating Pangulong Joseph Ejercito Estrada at si dating Ambassador Extraordinary and Plenipotentiary to the People’s Republic of China, Ambassador Francisco Benedicto.
Kabilang rin sa mga ginawaran ng pagkilala ng APCU at Chinese Embassy sa pangunguna ni Ambassador Huang Xilian sina Honorary Chairman ng Anvil Business Club, Board Member at Chairman ng Federation of Filipino Chinese Chamber of Commerce and Industry Inc. Public Information & Media Committee, at Moderator ng Pandesal Forum ang 83-anyos na si Wilson Lee Flores.
Pasok rin sa parangal si Manila Standard Columnist Rod Kapunan, Manila Times Columnist at book author Mauro Gia Samonte at Princess Jacel Kiram ng Sultanate of Sulu.
Hindi rin nagpaiwan sina dating National Press Club President Paul Gutierrez, Philippine Director of Confucius Institute at Angeles University Foundation Professor Cavin Franco Pamintuan, Senior Lecturer sa University of the Philippines Visayas Professor Celso Cainglet, at dating city councilor at pinuno ng Davao City Investment and Promotion Center (DCIPC) April Marie Dayap.
Bukod sa mag-asawang Marcos, dumalo rin sa araw ng parangal si APCU Board Members dating Pangulong Gloria Macapagal-Arroyo, Cagayan Economic Zone Authority (CEZA) Chief Executive Officer Secretary Raul Lambino at APCU President Jeffrey Ng. (JESSE KABEL)
107 
