PATULOY ang drug-related killings sa bansa, ayon sa isang grupo ng simbahan sa United Nations Human Rights Council (UNHRC), katunayan anila ay nasa 220 insidente sa ilalim ng bagong administrasyon at tatlo pa lamang dito ang nilitis.
“Drug-related killings continue with impunity under the administration of President Ferdinand Marcos Jr. with 223 victims since July 2022,” ayon kay Mervin Toquero ng National Council of Churches in the Philippines (NCCP) sa 52nd regular session ng UNHRC, noong Huwebes.
“There is also very minimal accountability for perpetrators since the time of [former] President Rodrigo Duterte,” dagdag na pahayag ni Toquero.
Si Toquero ay program secretary ng NCCP. Ang NCCP ay bahagi ng Philippine Universal Periodic Review Watch na nagpartisipa sa session sa Geneva, Switzerland.
Si Pangulong Marcos, pormal na naupo sa kanyang posisyon bilang pangulo noong Hulyo, ipinagpatuloy ang anti-drug campaign ni dating Pangulong Rodrigo Roa Duterte subalit nag-shift ito sa “reduction at rehabilitation.”
Ayon sa government data, may 6,000 drug suspects ang napatay sa police operations simula Hunyo 2016. Subalit sinabi ng human rights groups na maaaring mas mataas pa ang death toll.
Nauna rito, sinabi naman ni Justice Secretary Jesus Crispin Remulla sa UNHCR na hindi kukunsintihin ng Pilipinas ang “unjustified external interference” sa isinasagawang imbestigasyon nito kaugnay sa di umano’y krimen na inuugnay sa bloody drug war ng nagdaang administrasyon.
Sa kabilang dako, sinabi naman ng US State Department na ang ‘impunity’ ay “significant problem” sa security forces, partikular na sa Philippine National Police (PNP).
Samantala, ipinagpatuloy na ng International Criminal Court ang imbestigasyon nito sa drug war sublit umapela ang pamahalaan at iginiit na walang hurisdiksyon ang korte sa bansa matapos na magbitiw ang Pilipinas sa membership nito epektibo, Marso 2019. (CHRISTIAN DALE)
142 
