(BERNARD TAGUINOD)
WALANG masyadong aasahan ang mga maralita sa sandali ng pangangailangan. Dangan naman kasi, ang pondo para sa social services, napunta sa intelligence fund ni Vice President Sara Duterte, ayon sa minorya sa Kamara.
Paniwala ni House Assistant Minority Leader Rep. France Castro ng ACT party-list group, isinakripisyo ng mga mambabatas na miyembro ng Bicameral Conference Committee ang alokasyon ng social services para pondohan ang intelligence fund na hiling ng Office of the Vice President at National Task Force to End Local Communist Armed Conflict (NTF-ELCAC).
Tutol man, natuloy pa rin ang ratipikasyon ng Bicameral Conference Report kaugnay ng P5.268 trilyong pondo ng gobyerno sa susunod na taon.
“If we look at the bicam approved budget, the Department of Agrarian Reform budget was slashed by P4.5 billion while that of the Commission on Higher Education by P4.1 B and Health budget by P871M… as well as Agriculture by P857M just to to fund the P10 billion budget of the NTF-ELCAC and the P500 million confidential and intelligence fund of VP Sara Duterte,” ani Castro.
Nagpasaring din ang militanteng kongresista sa ginawang pagbibigay ng P10 bilyon sa NTF-ELCAC na pinaglaanan lang ng P5 bilyon sa orihinal na bersyon ng 2023 General Appropriations Act.
Bukod sa P500 million an intelligence at confidential fund ni Duterte sa OVP ay ibinigay din ng buong-buo ang P150 million na confidential fund sa Department of Education (DeEd) na kanya ring pinamumunuan.
Para kay Castro, mistulang pork barrel ang mga pondong inilipat sa mga naturang tanggapan ng gobyerno.
“Kinuha nila ang pondo para sa social services tapos ginawang pork barrel?! Wala ba silang pake maski 8% na ang inflation rate ng bansa at hirap na hirap na ang mga kababayan natin basta maipagpatuloy nila ang pagkakalat ng ‘fake news’ at supilin ang pumupuna sa mali nilang mga polisiya.”
305 
