SUGATAN ang isang 55-anyos na biker makaraang saksakin ng isang 46-anyos na scavenger sa Nicolas Zamora Street, Barangay 5, Tondo, Manila.

Nasa malubhang kalagayan sa pagamutan ang biktimang kinilalang si Diosdado Pabelonia, may asawa, pedicab driver, at residente ng Tondo, Manila.

Nadakip naman ang suspek na kinilalang si Harlem Nitro, 46, sa isinagawang “Oplan Galugad” ng mga awtoridad.

Ayon sa ulat nina Patrolman James Duquena, duty officer sa Station Tactical Operation Center, ng Manila Police District-Moriones Police Station 2, bandang alas-5:40 ng umaga nitong Miyerkoles nang mangyari ang insidente sa nabanggit na lugar.

Agad namang nagsagawa ng follow-up operation ang mga tauhan ng Asuncion Police Community Precinct, sakop ng Moriones Police Station 2, na nagresulta sa pagkakadakip sa suspek. (RENE CRISOSTOMO)