Hangga’t hindi nababakunahan ang 70% population SENIORS STAY-AT-HOME PA RIN

BINIGYANG-LINAW ng Malakanyang na hindi naman pinagbabawalan ang mga senior citizen lalo na’t kung “fully vaccinated” na ang mga ito laban sa COVID-19 na lumabas ng kanilang tahanan.

Tugon ito sa pagbabawal pa rin sa mga nakatatanda na magtungo sa matataong lugar gaya ng mall o mga saradong establisimyento tulad ng mga restaurant.

Sinabi ni Presidential spokesperson Harry Roque, puwede aniyang lumabas ang mga senior citizen para bumili ng kanilang pangangailangan.

Bukod dito ay pinapayagan din ang mga senior citizen na mag-ehersisyo para sa health promotion.

Kinakailangan aniya kasi na manatiling malusog ang mga senior citizen laban sa COVID-19.

Subalit ang pagpapalabas aniya matapos na mabakunahan ay depende kapag nakamit na ng Pilipinas ang population protection.

“Ibig sabihin, hindi lamang naman po yung nabakunahan ang kinakailangan na magkaroon ng proteksyon dahi kinakailangan na mas marami pa sa populasyon ang magkakaroon ng proteksyon dahil ang bakuna po is not a guarantee na hindi na kayo tatamaan ng Covid. It is a guarantee na siguro ay hindi na kayo magkakasakit ng malala o hindi na kayo mamamatay pero iba po ang kondisyon ng mga seniors .. they are specially vulnerable. So, ang effect po ng bakuna sa isang malusog na kabataan ay hindi po kapareho sa isang matanda. So, let us veer on the safer side na hanggang wala pa pong population protection, habang hindi pa natin nababakunahan ang 70% ng ating populasyon .. stay home po muna ang ating mga lolo’t lola,” paliwanag ni Sec. Roque.
Sa ulat, nakatanggap na ng bakuna kontra coronavirus disease (COVID-19) ang 12 porsyento ng senior citizens sa bansa.

“Ang mga senior citizens, ito yung mababa, nasa nine to 12 percent palang so medyo kailangan natin bilisan ito kasi ito yung mga vulnerable, itong age group na ito na 60 and above,” ani DOH Undersecretary Leopoldo Vega.

“Kailangan natin hanapin yung mga matatanda para mabakunahan kasi kailangan natin mai-prevent yung death sa age group na ito. Malaki pa naman ang population nito,” dagdag niya.
Tinatayang 10 hanggang 20 milyon ang senior citizen sa bansa. (CHRISTIAN DALE)

40

Related posts

Leave a Comment