LEYTE – Patay ang isang lalaking guro makaraang pagsasaksakin sa loob mismo ng kanyang pinagtuturuang Baybay National High School sa Baybay City sa lalawigang ito, noong Linggo ng hapon.

Kinilala ang biktimang si Pee Jay Gonzaga Montero, 29, ng Barangay San Isidro, at MAPEH teacher sa nasabing eskwelahan.

Ayon sa Baybay Police, natagpuan ang duguang katawan nito malapit sa tangke ng tubig, ilang metro lamang ang layo naman mula sa kanyang opisina.

Lumabas sa imbestigasyon ng pulisya, sa loob ng tanggapan sinimulang atakehin ng suspek ang biktima dahil may mga bahid ng dugo roon. Posibleng pwersahang pinasok ng suspek ang opisina dahil sira ang padlock nito.

Tinangka pang tumakas ng biktima subalit hinabol ito ng suspek

hanggang sa labas at doon muling pinagsasaksak na naging sanhi ng agarang pagkamatay nito.

Ayon pa sa report, posibleng isang estudyante sa eskwelahan ang gumawa ng krimen.

(NILOU DEL CARMEN)