P26.4-M MEDICAL SUPPLIES, DONASYON NG US SA DAVAO

INIHATID noong Biyernes ng gobyerno ng Estados Unidos, sa pamamagitan ng US Agency for International Development (USAID) at Department of Defense (DOD), ang halos P26.4 milyong ($528,000) halaga ng medical supplies upang palakasin ang pagtugon sa COVID-19 sa Davao City.

Ibinigay ni US Embassy in the Philippines Chargé d’Affaires (CDA) ad interim Heather Variava ang 10 intensive care unit (ICU) beds, apat na COVID-19 vaccine cold storage units, at iba pang kagamitan at suplay na medikal kay Davao City Mayor Sara Duterte-Carpio sa paglulunsad ng community-based COVID-19 response ng Davao City.

“Bilang kaibigan at kaalyado, ang Estados Unidos ay kaisa ninyo sa paglaban sa COVID-19 at pinapadali ang mga pangmatagalang hakbangin na tumitiyak sa kalusugan, kapayapaan, at kaunlaran sa timog Pilipinas,” sabi ng CDA Variava.

Ang USAID ay nakipag-partner sa Davao City Health Office upang bumuo ng isang plano para mapabilis, at maging accessible ang libreng mga serbisyo para sa COVID-19 sa pamamagitan ng pag-set up ng walong COVID-19 Cluster Clinic sa mga strategic na lokasyon. Ang mga klinika na ito ay magbibigay ng epektibo at mahusay na pagsubok, pagsusuri at contact tracing at pamamahala sa COVID-19.

Ang bagong donasyon na ito ay karagdagan sa P6.9 milyong ($138,600) halaga ng ICU beds at COVID-19 vaccine cold storage units na naibigay ng U.S. DOD sa Pilipinas noong Oktubre at Nobyembre.

“These challenging times reinforce the strength of our partnership,” pahayag ni Maj. Scott Holub, Special Operations Task Force 511.2 commanding officer.

“Our donation to the COVID-19 Cluster Clinic represents our continued support to the southern Philippines in its fight against the COVID-19 pandemic.  The donated refrigerators bolster Davao’s efforts by providing the capacity to store 80,000 vaccines, while the ICU beds provide the capacity for extended patient care.”

Malugod na tinanggap ni Department of Health Assistant Secretary Dr. Roy B. Ferrer ang suporta at pakikipagtulungan sa gobyerno ng U.S.

“Ang tulong ng USAID sa pagpapabuti ng mga kapasidad ng lokal na sistema ng kalusugan—sa pamamagitan ng pakikipag-ugnayan sa mga stakeholder ng barangay para palakasin ang pag-iwas, pagtuklas, paghihiwalay, at pagre-refer sa mga District Health Office—ay napatunayang mahalaga sa pagpapagaan ng pagkalat ng impeksyon sa komunidad,” aniya. “Ang suporta ng USAID sa pagtaas ng kapasidad sa pagtukoy at pagsusuri ng kaso ay makikita sa pamamagitan ng pagpapadala ng mga mobile swabbing team at pagbibigay ng mga testing kit at mga supply, kasama na ngayon ang pag-deploy ng mga pangkat ng pagbabakuna sa malalayong lugar.”

Sa ngayon, ang Estados Unidos ay nakapagbigay na ng mahigit sa P1.9 bilyon ($39 milyon) upang suportahan ang pagtugon ng Pilipinas sa COVID-19.

Samantala, bumisita rin ang CDA Variava sa Philippine Eagle Center sa kanyang paglalakbay sa Davao.

Sinusuportahan ng USAID ang pagsisikap ng Philippine Eagle Foundation na protektahan ang tirahan ng Philippine eagle sa Mindanao.

Sinusuportahan din ng U.S. Forest Service ang mga pagsisikap sa pag-iingat ng agila sa lalawigan ng Apayao, isang pangunahing lugar ng pagpaparami sa Northern Luzon.

Ang Philippine eagle, ang pambansang ibon ng Pilipinas at ang pinakamalaking agila sa mundo, ay malapit nang maubos sa loob ng 40 taon, at 400 pares na lamang ang natitira.

Sa taong ito ay ginugunita ang ika-75 anibersaryo ng diplomatikong relasyon sa Pilipinas at 60 taon ng partnership para sa kaunlaran sa pamamagitan ng USAID. Sa nakalipas na 60 taon, ang USAID ay nakipagtulungan sa gobyerno ng Pilipinas at mga lokal na organisasyon upang makamit ang mga layunin sa pag-unlad, na namumuhunan ng higit sa $5.1 bilyon upang suportahan ang Pilipinas. (JESSE KABEL)

6

Related posts

Leave a Comment