TARGET COLUMN NI KA REX CAYANONG

INILABAS ng Commission on Elections (Comelec) En Banc ang Writ of Execution na nagtatapos sa mahabang proseso ng disqualification laban kay suspended Legazpi City Mayor Carmen Geraldine Rosal.

Ipinag-utos ng Comelec na ipawalang-bisa ang kanyang proklamasyon at i-proklama si Atty. Alfredo Garbin Jr. bilang opisyal na alkalde ng lungsod.

Ang hakbang na ito ay may matinding epekto hindi lamang sa pulitika ng Legazpi kundi pati na rin sa pamamahala sa buong lalawigan ng Albay.

Matatandaang kinatigan ng Korte Suprema ang desisyon ng Comelec na nagdiskwalipika kina Carmen Geraldine Rosal at asawa niyang si Noel Rosal mula sa mga posisyong kanilang napanalunan noong 2022 elections.

Ang kanilang paglabag daw sa Omnibus Election Code—lalo na ang pag-disburse ng government funds sa panahon ng eleksyon—ay itinuturing na malinaw na pagsuway na naglalagay sa kanilang integridad sa alanganin.

Ang ganitong mga kaso ng paglabag ay patunay ng mga hamon sa pagpapanatili ng patas at makatarungang halalan sa bansa.

Mabigat ang mga parusang ipinataw ng Ombudsman sa mag-asawang Rosal. Si Carmen Rosal ay sinuspinde ng isang taon, habang si Noel Rosal ay hindi na maaaring humawak ng anomang posisyon sa gobyerno dahil sa hatol ng grave misconduct at iba pang kasong administratibo.

Ang mga kasong ito ay nagbubukas ng diskusyon tungkol sa pananagutan ng mga lider sa kanilang pamamalakad, at nagbibigay ng mensahe na ang mga paglabag sa batas ay hindi dapat palagpasin.

Ang pagdiskwalipika rin kay Jose Alfonso Barizo bilang konsehal ng Legazpi dahil sa paglabag sa election spending ban ay nagpapakita ng determinasyon ng Comelec na linisin ang mga prosesong may bahid ng paglabag sa batas.

Sa mga desisyong tulad nito, nagbibigay ang Comelec ng malinaw na pahiwatig sa mga opisyal ng pamahalaan na ang kanilang mga aksyon ay may kaukulang pananagutan at kaparusahan.

Ang pagkakaroon ng mga kasong administratibo at paglabag sa election laws ay naglalantad sa mga kahinaan ng ilang pinuno sa pagpapatupad ng tamang pamamahala at integridad sa serbisyo-publiko.

Ang desisyon ng Comelec laban kina Carmen at Noel Rosal ay isang mahalagang paalala na ang tunay na pamumuno ay hindi lamang nasa kapangyarihan, kundi sa pagsunod sa batas at pagtugon sa interes ng publiko.

Ang hamon ngayon para kay Atty. Alfredo Garbin Jr. at sa kanyang pamumuno ay ang pagbabalik ng tiwala ng mga taga-Legazpi sa lokal na pamahalaan.

Siya ay may pagkakataong ipakita ang kanyang kakayahan na pamunuan ang lungsod nang may integridad at kaayusan.

Ang tagumpay ng kanyang panunungkulan ay hindi lamang para sa kanyang personal na kredibilidad kundi para sa pagbabalik ng dangal sa posisyon ng alkalde ng Legazpi.