SINO ang miyembro ng mababang kapulungan ng Kongreso na biglang nagkaroon ng boses matapos ang halos walong taon sa Kongreso dahil sa kanyang mas mataas na ambisyon sa susunod na eleksyon?
Ayon sa inyong DPA, as in Deep Penetration Agent, nasa huling termino na ang mambabatas, o nasa Kongreso ito sa loob ng pitong taon at 11 buwan bilang kinatawan ng isang malayong distrito sa Kabisayaan.
Gayunpaman, sa loob ng nabanggit na panahon ay halos hindi ito makausap, o mainterview, ng media dahil wala naman itong sasabihin, kaya iwas na iwas sa mga mamamahayag.
Kahit isang pagdinig sa isang isyu noong wala pang pandemya, tinangka ng media na kunan ng paglilinaw sa nasabing usapin kung saan siya ang chairman ng komite.
Gayunpaman, tumanggi ito at mabilis na umalis na tila takot na takot sa mga tanong ng mga mamamahayag, kaya kapag nagsasagawa ito ng hearing ay hindi na ito pinapansin.
Alam kasi ng mga kagawad ng media na tatakbuhan lang sila ng mambabatas, kaya itinuring na lamang ito na isang ordinaryong mambabatas na dinadaan-daanan na lamang ng media.
Subalit nitong mga nakaraang araw, nagulat ang mga kagawad ng media sa Kamara dahil bigla itong naglalabas ng kanyang mga press release, bagay na hindi nito nagawa sa nakaraang walong taon sa Kongreso.
Bagama’t madalang naman ang mga press release nito, ikinagulat pa rin ito ng mga kagawad na media dahil ang alam nila ay wala itong interes na marinig ang kanyang boses maliban sa kanyang mga constituent.
Lalong ikinagulat ng mga kagawad ng media na gusto raw ng mambabatas na ito na dumalo sa lingguhang forum sa Kamara, gayung noong baguhan ito ay tumatanggi sa mga press conference.
Nabatid na nagla-lobby ang mga ‘bataan’ ng mambabatas sa organizer ng lingguhang forum na kung puwede ay i-guest ang kanilang boss dahil marami itong isyung gustong pag-usapan.
Nitong mga nakaraang mga araw, nakikitang nagpapainterview na rin ito sa mga radyo at telebisyon, kaya mistulang nagkaroon ng himala dahil bigla itong nagkaroon ng interes sa mga isyu sa lipunan.
‘Yun pala ay gusto lang magparamdam ng mambabatas sa buong bansa dahil meron pala itong ambisyon na tumakbo sa mas mataas na posisyon sa susunod na eleksyon.
Clue: Kung kasikatan ang pag-uusapan, kilala naman ang mambabatas na ito, pero hindi napag-uusapan ang kanyang pangalan sa buong bansa sa matagal na panahon. Mayroon siyang inisyal na…G as in Girl s’ya.
115 
