PUNA ni JOEL O. AMONGO

KAPUNA-PUNA ang hindi pagdalo ni dating Presidenteng Rodrigo Roa Duterte sa ika-10 pagdinig ng Quad Committee, at sa halip ay ipinadala ang kanyang legal na kinatawan, si Atty. Martin Delgra III.

Ngunit maging si Delgra ay hindi rin dumalo, bagkus ay nagpadala lamang ng liham na naglalaman ng paliwanag ng dating pangulo sa pagdinig.

Ayon kay Digong, naibahagi na niya ang lahat ng kanyang masasabi sa naunang sesyon ng Senado—na para bang sapat na ang minsang pagsagot sa taumbayan.

Sa naturang pagdinig sa Senado, nagbigay si Duterte ng mga pag-amin.

Inutusan niya ang mga pulis na hikayatin ang mga suspek na lumaban upang magkaroon sila ng dahilan para patayin ang mga ito.

Inamin din niya ang pagkakaroon ng isang lihim na Davao Death Squad—isang pangkat na pinapatay ang sinomang itinuturing niyang banta.

Ngunit sa kabila ng pagsisikap ni Senador Risa Hontiveros na gawing seryoso ang mga usapan, ang mga kakampi ni Duterte ay nagbalewala sa mga pag-amin, tumatawa pa, na para bang ang mga pahayag ay walang bigat at hindi nakaukit sa mga dugo’t luha ng mga pamilyang naapektuhan ng extrajudicial killings.

Ngayon, umatras ang former president sa likod ng kanyang mga kaalyado sa Senado. Sa nakaraang sesyon ng Quad Committee, iginiit ng kanyang abogado na kailangan ni Duterte ng pahinga at nangako na dadalo siya sa susunod na mga pagdinig pagkatapos ng Nobyembre 1.

Subalit sa halip na tuparin ang pangakong iyon, lumipad si Duterte papuntang Maynila para sa pagdinig sa Senado, kung saan alam niyang poprotektahan siya ng kanyang mga tapat na tagasuporta—sina Bong Go, Bato Dela Rosa, Jinggoy Estrada, at Robin Padilla—upang siyang ipagtanggol at ilayo sa pananagutan gaya ng dati.

Ang pagdinig na ito ay pinutakte ng mga pag-PUNA ng netizens dahil sina Sen. Bato at Go ay kasama sa idinadawit sa war on drugs ng dating administrasyon, subalit kasama sila sa mga senador na nag-iimbestiga sa resource persons.

Binatikos ni Congressman Adiong ang mga kilos ni Duterte bilang isang pag-iwas sa imbestigasyon ng QuadCom.

Ayon kay Congressman Paduano, ginawa ni Duterte na tila isang biro ang mga pagdinig na ito. Sa pamamagitan ng kanyang abogado, paulit-ulit na nangakong makikipagtulungan siya, at sinabing haharap siya sa Quad Committee kung ang mga tanong ay “matalino.”

Gayunpaman, ang kanyang patuloy na pagliban ay nagpapakita ng lahat ng mga dapat malaman.

Pinatutunayan lamang niya ang kanyang takot sa mga tanong ng Quad Committee—isang lupon na matiyagang iniimbestigahan ang madugong pamana ng kanyang administrasyon.

May mga bagay na hindi nagbabago, kahit sa kanyang pagtanda, nananatili si Duterte bilang ang lider na madalas na bumabawi sa kanyang mga pangako.

Ang mapiling pagdalo ni Duterte ay nagpapakita ng isang trahedya sa hustisya. Tinalikuran niya ang Quad Committee sa kadahilanang edad at kalusugan, ngunit sabik siyang dumalo sa Senado, kung saan siya’y sinusuportahan ng kanyang mga kaalyado at tinitira ang ibang testigo.