TARGET COLUMN NI KA REX CAYANONG

SA isang bansa kung saan ang pulitika ay tila palaging may halong kontrobersya, muling nabuksan ang usapin ng political harassment.

Ito’y matapos ang pagsasampa ng reklamong technical malversation laban kay Marikina Mayor Marcy Teodoro at tatlong iba pang opisyal.

Hindi maikakailang may mga tanong na sumulpot sa likod ng timing ng reklamong ito, lalo na’t ilang mayor na kilala sa kanilang prinsipyo ng mabuting pamamahala, tulad nina Baguio Mayor Benjie Magalong, Iloilo Mayor Jerry Treñas, at Pasig Mayor Vic Sotto, ang naging target ng kaparehong taktika.

Ang pagsasampa ng reklamo laban kay Mayor Teodoro ay naganap sa panahon ng paghahanda para sa susunod na eleksyon.

Hindi maiiwasang isipin na ang timing ng reklamong ito ay maituturing na bahagi ng isang mas malawak na estratehiya ng mga kalaban o pamumulitika na naglalayong pahinain ang mga lokal na lider na nagsusulong ng mabuting pamamahala.

Isang seryosong tanong ang bumabalot dito. Ito ba ay isang hakbang ng hustisya o isa na namang halimbawa ng pulitikang pinapaandar ng personal na interes?

Aba’y hindi rin maikakaila na ang Marikina mayor ay nakatindig sa kanyang pahayag na ang mga pondo ng PhilHealth na tinutukoy sa reklamo ay nananatiling buo at accounted for, bagay na napatunayan sa mga nagdaang audit.

Kung totoo ang kanyang sinasabi, hindi ba’t karapat-dapat lamang na bigyan siya ng patas na imbestigasyon bago siya hatulan ng publiko?

Ang panawagan ni Mayor Teodoro para sa patas na imbestigasyon ay dapat maging gabay sa atin.

Ang mga akusasyon ay dapat suriin batay sa ebidensya at hindi sa kulay ng pulitika.

Sa panahong ang bansa ay dumaraan sa mga pagsubok, mahalaga ang pagkakaroon ng tiwala sa proseso ng hustisya, na hindi dapat ginagamit para sa personal na interes ng iilan.

Dapat ay manatiling mapanuri ang publiko sa mga ganitong usapin. Kailangang tiyakin na ang hustisya ay umiiral, na ang mga lider ay hindi ginagamit na pawn sa masalimuot na laro ng pulitika.

Ang laban para sa katotohanan at mabuting pamamahala ay dapat manatili sa ating kamalayan, upang ang sinomang maninindigan para rito ay patuloy na mabibigyan ng katarungan.