CAVITE – Sugatan ang isang Lalamove rider na nag-deliver ng lechon makaraang barilin ng riding in tandem at tinangay ang kanyang motorsiklo sa Imus City noong Linggo ng hapon.

Nilalapatan ng lunas sa Medical Center of Imus City ang biktimang si Efren Ligtas y Pelegreno, dahil sa tatlong tama ng bala sa katawan.

Inaalam pa ng mga awtoridad ang pagkakakilanlan ng mga suspek na magka-angkas sa isang itim na motorsiklong Honda Click.

Ayon sa ulat, tumigil ang biktima at nagpahinga sa gilid ng kalsada sa Brgy. Palico 4, Imus City bandang alas-4:30 ng hapon noong Linggo matapos mag-deliver ng lechon gamit ang kanyang pulang motorsiklong Honda.

Ilang sandali lang ang nakalipas nang tumigil din ang sinasakyang motorsiklo ng mga suspek, naglabas ng baril at tinutukan ang biktima at kinukuha ang kanyang motorsiklo.

Sa takot ng biktima, kumaripas ito ng takbo subalit binaril siya ng tatlong beses ng mga suspek saka tinangay ng mga ito ang kanyang motorsiklo. (SIGFRED ADSUARA)