CAVITE – Hawak na ng mga awtoridad ang isang binatilyo makaraang pagsasaksakin at napatay ang isang lalaki nang nagtalo habang nagkukuwentuhan sa Dasmariñas City noong Martes ng gabi.

Isinugod sa De La Salle University Hospital ang biktimang si alyas “Elijah” subalit hindi na umabot nang buhay.

Nasa kustodiya na ng Dasmariñas City Social Welfare and Development ang suspek na si alyas “Denz” matapos naaresto nang ituro ng isang saksi sa insidente.

Ayon sa ulat, bandang alas-10:05 ng gabi nang mangyari ang insidente habang nagkukuwentuhan ang dalawa at isang kaibigan sa Brgy. Zone 4, Dasmariñas City, Cavite.

Hindi umano nagtugma ang opinyon ng mga ito sa isang bagay na nagresulta sa kanilang pagtatalo hanggang naglabas ng patalim ang binatilyo at pinagsasaksak ang biktima.

Isinugod ang biktima sa ospital subalit hindi umabot nang buhay habang naaresto naman ang binatilyo makaraang inguso ng kasama nila na siyang sumaksak sa biktima. (SIGFRED ADSUARA)