(NI VT ROMANO, Saksi Ngayon, Sports Editor)
TOTOO sa kanyang pangako, pinatulog ni Johnriel Casimero sa 10th round si Mexican challenger Cesar Ramirez para mapanatili ang kanyang WBO interim bantamweight crown kagabi sa San Andres Sports Complex sa Maynila.
Dalawang beses pinabagsak ng 30-anyos na si Casimero si Ramirez bago tinapos sa pamamagitan ng right hook ang Mehikano sa 2:23 ng nasabing round.
“Nakakita ako ng tiyempo, kaya dineretso ko na,” sambit ni Casimero matapos ang stoppage.
Bago ang laban, nangako si Casimero na kanyang patutulugin si Ramirez, bagamat hindi siya nagbigay kung anong round.
“’Yung lakas (power) ko, yun ang advantage ko sa kanya,” ani Casimero sa media workout kamakalawa.
“Matangkad ung kalaban kaya pasok ang suntok ni Casimero, sabi ko pasukin lang niya,” ani Nonoy Neri, trainer ni Casimero, na ngayo’y hahamon bilang mandatory challenger kay regular WBO champion Zolani Tete ng South Africa.
70 
