PBA Commissioner’s Cup TOP 2 SPOT AAGAWIN NG GINEBRA

Ni ANN ENCARNACION

MAKUHA ang Top 2 spot at natitirang twice-to-beat advantage ang misyon ng Barangay Ginebra sa ongoing PBA Commissioner’s Cup.

Nakatakdang sagupain ng Ginebra, may 7-2 panalo-talo, ang nanganganib mapatalsik na NLEX (3-7) sa tampok na laro sa 5:45 ng hapon ngayon (Biyernes) sa PhilSports Arena.

Bago ito, maghaharap sa alas-3 ng hapon ang parehong naghahabol mapabilang sa Magic 8 na Blackwater (3-8) at Rain Or Shine (4-6).

Kasalukuyang pangatlo sa standing ang Gin Kings at kung magwawagi kontra Road Warriors ay tatabla sa pumapangalawang Magnolia Hotshots (8-2).

Tanging No. 1 at 2 ang makakakuha ng twice-to-beat ­advantage, na una nang nasungkit ng guest team Bay Area ­Dragons (10-2).

Ratsada ngayon ang Kings, may limang sunod-sunod na panalo at patuloy pang lumalakas sa pangunguna ng kanilang resident import at malapit nang ­maging Pinoy na si Justine Brownlee.

Nitong Lunes ay inaprubahan ng Senate Justice and Human Rights Committee ang proposed Filipino citizenship ng 34-anyos na si Brownlee. Siya ay may five championships at two-time Best Import sa Ginebra, at inaasahan ng Samahang Basketbol ng Pilipinas (SBP) maging ­naturalized player ng Gilas para sa sixth window ng FIBA Asian qualifiers sa 2023.

20

Related posts

Leave a Comment