HINILING ng tatlong abogado, sa pangunguna ni Eldrige Marvin Aceron, sa Supreme Court na utusan ang Senate Blue Ribbon Committee na ilabas ang draft partial committee report nito kaugnay ng kontrobersyal na imbestigasyon sa mga proyektong flood control.

Kasama ang mga kapwa abogado na sina Sikini Labastilla at Purificacion Bartolome-Bernabe, naghain si Aceron ng Petition for Mandamus and Certiorari sa Korte Suprema na kumukwestiyon sa pagtanggi ng Blue Ribbon Committee na pagbigyan ang kanilang hiling na kopya ng naturang partial committee report.

Sa liham na may petsang Pebrero 23, 2026, tinanggihan ng Blue Ribbon Committee ang kahilingan ng mga petitioner para sa opisyal na kopya ng dokumento, at iginiit ang “deliberative process privilege” upang maiwasan ang “chilling effect ukol sa malayang talakayan sa loob ng mga sangay ng pamahalaan.

Gayunman, iginiit ng mga petitioner na hindi na maaaring gamitin ang naturang pribilehiyo matapos na paulit-ulit na isiwalat ni Blue Ribbon Chairman Panfilo Lacson sa publiko ang nilalaman ng ulat sa loob ng tatlong linggo.

Sa mga opisyal na pahayag at panayam sa media, kinumpirma ni Lacson na inirekomenda sa draft report ang pagsasampa ng kasong plunder at iba pang reklamo laban sa mga pinangalanang kasalukuyang senador, at ito ay nakabatay sa testimonial at dokumentaryong ebidensya na nakalap sa mga pagdinig.

Kinumpirma rin ni Lacson na ang draft report ay sumasailalim sa pag-aayos ng wika habang pinananatili ang pangunahing natuklasan nito. Mahalaga ring banggitin na nalagdaan na ang ulat nina Senators Juan Miguel Zubiri, JV Ejercito, at Sherwin Gatchalian — na kalaunan ay binawi ang kanilang mga lagda nang walang anumang nakasulat na paliwanag.

“Chairman Lacson is the institutional holder of the deliberative process privilege he now invokes against petitioners. He is not a rogue subordinate acting without authority. He is the chairman — the very person empowered to decide what the committee discloses and what it withholds. When the privilege-holder chooses to publicly disclose the substance of the privileged material, the privilege is surrendered, not stolen,” ayon sa petisyon.

Kinuwestiyon din ng mga petitioner ang legal na batayan ng pagtanggi ng Blue Ribbon Committee, at itinuro na ang lahat ng kasong binanggit ng Senate Legal Counsel upang bigyang-katwiran ang hindi paglalabas ng ulat — kabilang ang Chavez v. Public Estates Authority, Akbayan v. Aquino, at Neri v. Senate Committee — ay nagmula sa mga pag-angkin ng executive branch ng pribilehiyo, at hindi ng lehislatura.

Wala ni isa sa mga kasong ito ang tumalakay sa paggamit ng lehislatura ng pribilehiyo laban sa mamamayan hinggil sa mga natuklasan ng isang natapos na pampublikong imbestigasyon.

Binigyang-diin pa ng mga petitioner na ginagarantiyahan ng 1987 Constitution ang karapatan ng taumbayan sa impormasyon hinggil sa mga usaping may kinalaman sa pampublikong interes.

“The right to information is not a gift from the state to the citizen. It is a guarantee the citizen holds against the state. It is time this Honorable Court enforced it,” dagdag nila.

Humihiling ang mga petitioner ng agarang aksiyon mula sa Korte Suprema, kabilang ang pag-isyu ng Temporary Restraining Order at/o Status Quo Ante Order na mag-uutos sa Senate of the Philippines at sa Senate Blue Ribbon Committee na panatilihin at huwag sirain, baguhin, itago, o rebisahin ang lahat ng bersyon ng draft partial committee report — lalo na ang bersyong may orihinal na mga lagda nina Zubiri, Ejercito, at Gatchalian — habang dinidinig ang kaso.

Hiniling din nila ang pag-isyu ng writ of mandamus na mag-uutos sa Blue Ribbon Committee na ilabas ang buo, kumpleto, at walang redaksiyong draft partial committee report ayon sa anyo nito noong mga Pebrero 3–4, 2026.

Bilang alternatibo, hinihiling nila ang writ of certiorari na magpapawalang-bisa sa pagtanggi ng Komite noong Pebrero 23, 2026, sa dahilang ito ay inilabas nang may grave abuse of discretion at lumalabag sa konstitusyonal na karapatan sa impormasyon.

Hinihiling din ng petisyon sa Hukuman na atasan sina Senators Zubiri, Ejercito, at Gatchalian na magsumite ng nakasulat na paliwanag sa pagbawi ng kanilang mga lagda sa draft report, at iutos sa Blue Ribbon Committee na magsumite ng certified true copy ng draft sa Senate Committee on Ethics and Privileges para magamit sa mga nakabinbing ethics complaint laban kina Senator Francis Escudero at Ejercito.

Nanawagan din sila na atasan si Ejercito na mag-inhibit sa lahat ng pagdinig ng Ethics Committee na may kinalaman kay Escudero hanggang sa maresolba ang petisyon, dahil sa umano’y direktang conflict of interest bilang isa sa mga lumagda at bumawi sa Blue Ribbon report at bilang presiding officer sa kaugnay na ethics case. (EG)