BATAS SA PAUPAHAN NABALEWALA

0

BINABALEWALA ng mga may-ari ng paupahan sa Metro Manila at iba pang urbanized cities sa buong bansa ang batas sa paupahan o ang Rent Control Act in the Philippines (RA 9653).

Maraming kawawang mga pamilya ang pinaalis sa kani-kanilang mga inuupahang bahay ng kanilang landlords, habang nasa kasagsagan ng lockdown sa buong bansa dahil sa COVID-19 pandemic.

Halos dalawang taon na ang COVID-19 mula noong Marso 2020, dito rin nagsimula ang kalbaryo ng mga nangungupahan.
Marami ang nawalan ng hanapbuhay o trabaho.

Marami kasi sa mga kumpanya ang pansamantalang nagsipagsara dahil halos lahat ng mga tao ay hindi makalabas sa kani-kanilang mga tahanan dulot ng COVID-19 pandemic.

Sinabayan pa nang mahigpit na quarantine protocols na ipinatutupad ng gobyerno.

Dahil sa epekto ng COVID-19, marami sa mga negosyo ang tuluyan nang nagsipagsara at hindi na nakabawi sa kanilang pagkalugi.

Umasa na lang sa ayuda ng pamahalaan ang nakararaming Pinoy na hindi naman sapat para masuportahan ang pangangailangan ng mamamayan.
Nariyan pa ang problema sa buwanang renta ng mga nangungupahan.

Kaya karamihan sa kanila ay pinalayas dahil wala na silang maibayad na buwanang renta.

Hindi dapat binabale­wala ang batas sa paupahan o ang Rent Control Act in the Philippines (Republic Act 9653).

Sakop nito ang nangungupahan na may renta na P10K pababa sa Metro Manila at highly urbanized cities sa buong bansa.

Kasama rito ang apartments, boarding houses, bedspace, dormitories, rooms for rent, land or house and lot.

Sa Civil Code of the Philippines naman, nakalagay sa lease provisions ang renta na higit sa P10K sa commercial spaces at rent-to-own units.

May limit ang pagtataas ng renta, sa buwanang renta na P4,999 pababa ay may maximum rent increase lamang na 2%; ang P5,000 hanggang P8,999 ay may maximum rent increase ­lamang na 7%, at ang P9,000 hanggang P10,000 ay pinapayagan lamang ang maximum rent increase na 11% sa loob o isang taon habang okupado ang mga unit.

Hindi rin pinapayagan ng RA 9653 na magtaas ng renta ng dalawang beses sa loob ng isang taon ang bedspace, boarding houses, dorms at rooms na inuupahan ng mga estudyante.

Walang hihingi ng deposit na lalagpas ng 2 buwan at 1 buwang advance.

Kailangan din ang 2 buwang deposit ay nakalagak sa bangko at kung natapos na ang kontrata ang ­nangungupahan ay ma­kukuha niya ang deposit kasama ang interest.

Depende kung wala siyang bayarin na naiwan tulad ng bill ng tubig, ­kuryente, nasira sa unit habang nakatira siya.

Dahil ang kanyang 2 buwang deposit ay gagawing pantapal sa kanilang naiwang mga bayarin.

Wala ring paaalising nangungupahan na walang sapat na basehan, ayon sa RA 9653.

Ito ang dahilan para paalisin ang mga nangungupahan ng may-ari ng unit:

1) Subleasing the property – pinaupahan niya sa iba ang kanyang inuupahan na unit na hindi alam ng may-ari.

2) Overdue rental payments – hindi nakababayad ng 3 buwang renta o higit pa.

3) Owner’s legitimate need to use the property – kung gagamitin ng may-ari ang unit. Pero hindi pwersahan ang pagpapaalis dahil kailangan niyang bigyan ng formal notice ang nag-uupa ng 3 buwan in advance.

4) Necessary house repairs – kung kinakailangang ayusin ang gusali o apartment.

5) Lease contract expiration – natapos na ang kontrata ng nangungupahan.

Nakapaloob din sa RA 9653 na illegal din ang pagpapaalis sa mga nangungupahan na ang dahilan ay pagkabenta at pagkasanla ng gusali o apartment sa third party.

Bagama’t naibenta na at naisanla ang apartment o gusali ay hindi maaaring paalisin ang nangungupahan ng bagong may-ari.

Kung ikaw ay COVID-19 patient o frontliner na hindi nakababayad ng renta sa rason na quarantine period at grace period.

Ang may-ari ay hindi maaaring magpaalis sa ­nangungupahan sa kanya sa panahon ng ECQ, MECQ at GCQ status.

Ang sino mang lalabag sa batas na ito (RA 9653) ay pagmumultahin ng P10k at pagkakakulong ng 2 buwan o pareho.

Read More

‘YAN ANG PROBLEMA NG MAGSASAKA

0

ANG isa sa ginagawang mga propaganda ng mga kandidato kapag panahon ng kampanya ay paunlarin ang sektor ng pagsasaka kaya sa mga nakaraang halalan, may mga senatorial candidate na kinukunan ng video sa bukid para sa kanilang TV Commercials.

‘Yung mga magsasaka naman ay nadadala sa kanilang propaganda lalo na’t kailangan na kailangan nila ang tulong mula sa national government para umangat naman ang kanilang kalagayan.

Pero kapag nanalo na ang mga kandidatong ibinoto ng mga magsasaka ay hindi na sila maaalala at matatapos na ang termino nila ay wala pa ring nangyayari sa sektor ng pagsasaka sa ating bansa.

Kanya-kanyang diskarte na lang ang mga magsasaka para makapagtanim dahil hindi naman talaga nila ramdam ang national government kahit bilyon-bilyon ang inilalaang pondo sa sektor na ito kada taon.

Kumakapit sila sa mga middleman para makapagtanim, maabonohan at mai­spreyan ng pesticide ang kanilang tanim na ang kapalit ay ibenta sa inutangan ang kanilang ani at ibabawas na dun ang kanilang utang kasama na ang tubo.

Ginagawa ito ng mga magsasaka lalo na ‘yung mga walang puhunan dahil wala naman talagang tulong ang national government sa kanila, sa totoo lang.

Kung may dumating man na tulong at tuwing nasasalanta ng kalamidad ay idinadaan pa ‘yun sa local officials at ‘yung local officials, mga tauhan at supporters lang nila ang nakikinabang at hindi ‘yung talagang mahihirap na walang puhunan sa pagtatanim.

Kapag panahon naman ng anihan, napipilitan ang mga magsasaka na ibenta ang bagong aning palay sa mga middleman dahil walang post harvest facilities kung saan puwede sana nilang patuyuin ang kanilang ani.

Siyempre dahil ibinebenta nang fresh o hindi pa natutuyo ang ani, binabarat ng mga middleman ang kanilang ani kaya kung kumita man ang mga magsasaka ay kakarampot lang at hindi sapat sa kanilang gastusin hanggang sa dumating ang susunod na anihan.

Madalas din na minamalas ang mga magsasaka lalo na’t regular na nagkakaroon ng bagyo sa panahon ng anihan o Ber months kaya karaniwang nasisira ang kanilang pananim.

Isa o dalawang linggo na lang aanihin na ang kanilang tanim pero wawasakin lang ng bagyo kaya ‘yung inaasahan nilang pambayad sa kanilang utang at kahit papaano ay magkaroon sila ng panggastos, maglalaho pa.

May mga magsasaka naman ang nakapag-ani na pero inabutan ng bagyo kaya nabubulok na lang ang kanilang ani lalo na kung tatlong araw nang hindi naibi­bilad ang kanilang produkto lalo na ang mais.

Ramdam ko ang bigat sa loob ng mga magsasaka sa Baggao, Cagayan dahil sa pagkasira ng kanilang aning mais na inabutan ng baha nang manalasa ang bagyong si Maring sa Norte.

Kung baga, pera na, naging bato pa kaya ramdam na ramdam ko ang sakit na nararamdaman nila dahil laki ako sa probinsya kung saan ang pangunahing hanapbuhay ay pagsasaka.

Tinagurian tayong agricultural country pero kulang na kulang ang tulong ng gobyerno sa mga magsasaka. Ang mga pangakong modernisasyon sa agriculture sector ay hindi pa rin nangyayari. Naiwasan ­sanang masira ang mga ­aning mais at palay kung moderno na ang pagsasaka sa ating bansa.

Read More

PWERSAHAN SA BAKUNAHAN

0

MULING nagpamalas ng pagiging brusko si Pangulong Rodrigo Duterte nang humarap sa kanyang dumadalas na paglabas sa telebisyon para mag-ulat kaugnay ng ginagawa ng ­administrasyon sa laban kontra pandemya.

Sa kanyang mensaheng ipinaabot sa publiko, muling nagpaandar ang Pangulo. Aniya, uutusan na raw niya ang Philippine National Police (PNP) na samahan ang mga kawani ng Department of Health para hanapin ang mga bantulot na magpabakuna para sa pwersahang turukan.

Bahagi ng paandar ni Duterte ang mala-akyat bahay na diskarte – ang pasukin ang bahay ng mga hindi pa bakunado at turukan sa ­kahimbingan ng tulog ng mga ito.
Giit ng Pangulo, dapat nang makamit ang herd immunity.

Susmaryosep! Marso pa nang simulan ng ­gobyerno ang turukan. Supply – hindi ang mga tao ang problema sa likod ng kabiguan ng gobyernong mahagip ang target nitong herd immunity.

At nang dumating ang supply, bigo ang mga ahensyang itinalaga para sa information and education drive na ipaunawa nang lubos sa publiko ang buting dala ng bakuna kontra COVID-19.

Ang masaklap, naglabasan ang ulat sa hindi magandang epekto nito sa ilan na dapat sana’y naipaliwanag ng mga inatasan.

Ang higit na nakababahala ay ang pamumulitika sa bakuna ng mga nasa pwesto. Ayon mismo kay vaccine czar Carlito Galvez ay pinipiit ng mga nakaupong gobernador at mayor sa iba’t ibang panig ng bansa ang pagbibitaw ng mga bakunang halos mag-expire na sa mga regional offices ng Department of Health (DOH).

Kung may dapat gamitan ng kamay na bakal, hindi ang publiko kundi ang mga politikong tinutukoy ni Galvez.

Kung tutuusin, batid ng Pangulong mali ang kanyang direktiba. Isa siyang abogadong aral sa probisyong ginagarantiyahan sa ilalim ng Saligang Batas na kanyang sinumpaang poprotektahan nang siya ay maluklok sa pwesto taong 2016.

Sa isang banda, nakasanayan na niya ang pagpapaikot ng batas mula pa nang siya’y pumasok sa gobyerno. Ang tokhang, ang naudlot na pagtakbo bilang bise-presidente, ang pagtangging ilabas ang kanyang Statement of Assets, Liabilities and Net Worth (SALN), ang giit na pagpalit ng kanyang anak sa Palasyo, ang pananabotahe sa trabaho ng Kongreso – ilan lang yan sa mga pruweba ng mga galawang brusko, kesehodang may batas na dapat sundin sinuman ang nasa pwesto.
Karapatang pantao ba kamo? Tinatawanan lang ‘yan ng administrasyon.

Read More

TNT muling kakatok sa PBA All-Filipino Cup Championship

0

WAGI kapwa ang Talk ‘N Text sa San Miguel Beer, 100-90, at Meralco kontra Magnolia Pambansang Manok, 102-98, noong Miyerkoles (Game 5) sa kanilang magkahiwalay na best-of-seven semifinal series ng 2021 PBA Philippine Cup.

Parehong impresibo ang naging pagwawagi ng Tropang Giga at Bolts na nasa ilalim kapwa ng MVP Group at ginanap sa DHVSU gym sa Bacolor, Pampanga. Muling lumamang ang Katropa ni coach Chot Reyes, 3-2, sa serye nila laban sa Beermen na nag­dala sa prangkisa para sa isang panalo na lamang tungo sa All-Filipino Finals.

Lamang pa rin ang Hotshots sa Bolts sa kanilang serye, 3-2, subalit para sa maraming tagasunod ng koponan, ipinamalas ng mga bata ni coach Norman Black na may kakayahan silang manalo sa semis at isaayos ang kauna-unahang All-MVP Group finale sa 46th PBA season.

Muling haharapin ng Katropa ang Beermen ni coach Leo Austria sa Game 6 ngayong araw, at tulad ng Hotshots ni basketball guru Chito Victolero na makakatapat naman ang Bolts, sisikapin nila na tapusin na ang serye. Misyon naman ng SMB at Meralco na palawigin pa ang Round of 4 hanggang Game 7 sa Linggo.

Tingin ng marami, mas malaki ang tsansa ng Bolts na ma-extend ang kanilang serye laban sa Hotshots, kung pagbabasehan ang inilaro ng mga alaga ni coach Norman sa Game 5 kung saan pinaikutan nina Aileen Maliksi, Nards Pinto at Chris Newsome ang kanilang mga guwardiya para masiguro ang panalo.

Sa panig ng Katropa, nilampaso ng kababalik lamang na 39-anyos na si Kelly Williams at ng injured na si Poy Eram ang ipinagmamalaki ng Beermen na si six-time MVP June Mar Fajardo sa kabuuan ng 48-minutong pagtutuos.

Inamin mismo ni TNT coach Chot ang kahalagahan nina Willliams at Erram sa naturang panalo. “They were of big help providing extra bodies to battle San Miguel giants June Mar Fajardo and Moala Tautuaa.”

Sa tatlong koponang ari ni MVP Group boss, businessman-sportsman Manny V. Pangilinan, na TNT, Meralco at North Luzon Expressway, tanging ang Katropa pa lamang ang nakalasap ng kampeonato sa kauna-unahang liga propesyonal sa bansa at Asya. Pitong beses nang nakapag-uwi ng korona ang TNT na naglaro din sa ilalim ng bandila ng Mobiline, 7-Up/Pepsi Cola.

Samantala, wala pang naipanalong titulo ang ­Meralco at NLEX, bagama’t may tatlong tropeo na bilang runner-up ang Bolts.

Read More

BUHAY KO, IPUSTA MO!

0

HINDI naging kalugod-lugod para sa hanay ng healthcare workers ang patuloy na pagbale­wala ng administrasyong Duterte sa panawagang pagbabago sa kagawarang butbot ng bulilyaso at katiwalian.

Sa sobrang pagkadismaya, ang mga doktor at nars na direktang sumasagupa sa pandemya habang nilulustay ng mga taong gobyerno ang kaban ng bayan, nagdeklara na ng isang malawakang panawagan laban sa pag-abuso at katiwalian.

Sa inilunsad na Indignation at Call to Action laban sa katiwalian, giit ng iba’t ibang grupo ng mga propesyonal sa larangan ng kalusugan – taympers muna sa nakawan.

Bagama’t hindi na bago ang paghihimagsik kontra korapsyon ng mga Pilipino, kakaibang laban ang matutunghayan dahil sa unang pagkakataon, pati ang mga doktor at nars nais nang makigulo. Ang kanilang puting unipormeng sukdulan sa kalinisan, isasabak na rin sa maruming lansangan.

Ang sektor na dating ayaw sumali, bubungad na sa harapan ng mga rally. Tama na! Sobra na ang sigaw nila sa pumupusturang hari. Dangan naman kasi, buhay ng mga Pilipino ang inilalagay sa kompromiso. Ang pondong pansagip buhay, hayun kabi-kabila ang paglulustay.

Tulad ng dati, deadma lang ang Pangulo sa panawagang sibakin ang mga itinalaga sa pwesto. Sukdulang awayin pati ang mga mambabatas sa Kongreso makaraang anomalya sa gobyerno ay isa-isang nabisto.

Para sa mga doktor, ang trabaho nila’y manggamot at tiyakin ang kalusugan ng bayan – kesehodang sino pa ang nakaupo sa Palasyo.

Pero sa pananalasa ng pandemya, tila sinabotahe ang hanay nila. Pinagod, pinuyat, inilagay sa peligro ng nakahahawang sakit, inalipusta, pinagdudahan at ang masakit – pati kanilang pinagpaguran ay ‘di pa binabayaran.

Marami na ang pumanaw sa hanay ng healthcare workers sa gitna ng giyera kontra pandemya. Mga nahawaan sa pagtupad sa tungkuling sinumpaan. Ang sagot ng gobyerno, may perang inilaan sa kanilang mga naulila.

Marami na rin ang sumuko at nagpasyang magbitiw sa kawalang malasakit ng namumunong baliw.

Bakit kailangan pang pumanaw ang mga doktor at nars para makuha ang kanilang pinaghirapan?

Sa patuloy na pagbabalewala sa kanilang panawagan, hindi malayong maubos ang mga nagtataguyod ng ating kalusugan at direktang sumasagupa sa nakamamatay na karamdaman. At pag nagkataon, sino na ang hahalili sa kanilang trabahong iiwan?

Simple lang naman ang kanilang kahilingan, ang linisin ang kagawaran at sibakin ang mga sangkot sa katiwalian.

Read More

KATOTOHANAN SA MARTIAL LAW

0

MATAGAL na pong isinisisi kay dating Pangulong Ferdinand E. Marcos ang karahasan daw na nangyari sa ilalim ng deklarasyon ng batas militar o Martial Law na ipinatupad noong 1972.

Hanggang ngayon ay mainit na usapin ito sa panahon ng halalan sa bayan ni Juan.

Lalo na ngayon na ang isa sa mga presidentiable ay anak ng dating Pangulong Marcos na si Ferdinand “Bongbong” Marcos, Jr. (BBM).

Palasak at gasgas na at paulit-ulit na lamang ang kanilang ibinabato sa dating Pangulong Marcos at maging sa anak nitong si BBM.

Marami na ang nagpatotoo sa tunay na dahilan kung bakit ibinaba ang Martial Law sa mga panahon ‘yun.

Mismong si Ginoong Herman “Ka Mentong” Tiu Laurel na isa sa pinakamalapit sa pamilyang Aquino, ay nagsalita na sa totoong dahilan ng pagdeklara ni Pangulong Marcos ng Martial Law.

Si Ka Mentong, sa ilalim ng administrasyon ni ­Pangulong Corazon Aquino, ay administrator ng Philippine Refugee Processing Center (PRPC) na ngayon ay Bataan Technology Park, Inc.).

Sa kabila ng pagiging malapit niya sa ­administrasyon ni Cory Aquino ay nagsalita siya at ikinuwento niya na kumbinsido siya na dapat lang ideklara ni Pangulong Marcos ang Martial Law.

Aniya, kung hindi ginawa ni Pangulong Marcos ang pagbaba ng Martial Law, ay komunista na ang Pilipinas ngayon.

Sa panahon na ‘yun ay talagang may bantang rebelyon sa gobyerno dahil sa panggugulo ng grupo ni Joma Sison, ang Communist Party of the Philippines New People’s Army-National Democratic Front (CPP-NPA-NDF).

Nangyari na ang Plaza Miranda bombing na isang political rally ng Liberal Party (LP) at isinisi nila ang pambobombang ito kay Pangulong Marcos.

Pero lumabas ang katotohanan makalipas ang ilang taon, na maraming lumutang na pakana ito ng kampo nina Joma Sison at Ninoy Aquino.

Mismong si dating Ex-General Victor Corpus na naging miyembro ng NPA at kalaunan ay bumalik sa ­gobyerno, ay nagsalita na ang nasa likod ng Plaza Miranda bombing ay sina Ninoy Aquino at Joma Sison.

Ang statement na ito ni Gen. Corpus ay sinang-ayunan ni Ka Mentong na kalaunan ay kumalas din sa grupo ng mga Aquino.

Maging ang dating rebeldeng si Father Conrado Balweg ng Cordillera Region, pinuno ng Lumbaya Company ng NPA, ay nagsalita rin na ang number 1 human rights violators ay ang CPP-NPA-NDF na pinangungunahan ni Joma Sison.

Ayon pa sa pananalita ni Fr. Balweg, marami ang ipinapatay ng kampo ni Joma Sison sa kanilang nasasakupan sa Cordillera Region, kabilang na ang ilang mga pari, matatanda at kabataan.

Ikinuwento pa ni Gen. Corpus na noong 1971 ay siya ang naatasan ng CPP-NPA-NDF na sumalubong sa barkong may pangalang M/V Karagatan na naglalaman ng isang libong mga baril na ­galing China para gamitin ng mga rebelde laban sa ­gobyerno ng Pilipinas.

Pero sa kasamaang palad ang shipment na ito ay nakita ng pribadong eroplano kaya naitimbre ito sa militar.

Kung kaya’t nagkaroon ng palitan ng putok sa pagitan ng militar at grupo ni Corpus.

Sa halip na isang libong baril ang mapupunta sana sa mga rebelde ay halos tatlong daan na lang ang nakarating sa mga NPA.

Iisa lang ang ibig sabihin niyan, ayaw ng Panginoon na malagay sa kapahamakan ang lahi ni Juan dela Cruz.

Kaya malinaw na ito ang dahilan kung bakit idineklara ni Pangulong Marcos ang Martial Law.

Ngayon ang mga dilawan ay paninira pa more laban kay BBM! Bistado na kayo!

Kung tama ang mga ipinaglalaban n’yo, bakit kumalas sa inyo ang malalapit sa inyo, ibig sabihin nagising na sila na ginagamit n’yo lang sila para baliktarin ang katotohanan.

Maging ang dating Vice President ni Cory Aquino na si Doy Laurel ay kumalas din sa kanila.

Nangangahulugan lamang na hindi nila masikmura ang inyong ginagawang panlilinlang sa taumbayan.

Hanggang ngayon ay hindi n’yo pa rin matanggap na bistado na ang inyong plano na gusto n’yong gawing komunista ang Pilipinas at kayo ang mamumuno.

Sila ang dapat imbestigahan ng International Criminal Court (ICC) para malaman kung gaano karami ang kanilang biktima ng human rights.

Basang-basa na ang inyong mga papel sa ­taumbayan, kaya kahit anong paninira n’yo kay BBM ay lalo pa itong nagpapalakas sa kanyang pagkatao. Mga ­sinungaling!

oOo

Para sa suhestiyon at reaksyon, mag-email sa ­joel2amongo@yahoo.com.

Read More

NAKAKAUMAY ANG DRAMA SA SUBSTITUTION

0

ANG substitution ay sadyang isinama sa election law upang lahat ng mga kandidato na mamamatay o madiskuwalipika bago ang araw ng halalan, ay puwedeng palitan ng kanilang mga kaanak.

May mga kandidato kasi sa local position ang biglang namamatay o ma-DQ bago ang halalan at dahil sa probisyon sa batas, maaari silang i-substitute ng kanilang mga kaanak… dapat kaapelyido nila.

Pero nasilipan ng mga henyo ng butas ang batas na ito kaya kahit hindi namatay ang isang naghain ng Certificate of Candidacy (COC) ay puwede silang palitan ng kanilang mga kaanak.

Nangyari na iyan sa kaso ng isang congressional candidate sa Pangasinan at ginamit ding istilo ni Pangulong Rodrigo Duterte noong 2016 presidential election kaya naging popular ang substitution.

Puwede sabihing political strategy ni Duterte na huwag munang maghain ng kanyang COC noong 2015 kaya ang kanyang supporter na si Martin Diño ang pinaghain nila ng COC sa pagkapangulo.

Epektibo naman ang strategy dahil si Digong ang pinag-uusapan kung tatakbo ba siya o hindi. Lalong nakatulong ‘yun sa kanyang popularity lalo na’t hinaluan nila ng drama na “tumakbo ka para sa bayan”.
Mahilig ang Pinoy sa drama at nakuha ni Duterte ang atensyon ng mga tao kaya kunwari… “Sige tatanggapin ko ang hamon ng bayan” at pinalitan si Diño bago matapos ang substitution deadline and the rest is history.

Muling ginagamit ng kanyang mga bata ang istilo at drama na ito kahit bumenta na noong 2016 election dahil imbes na si Duterte ang maghahain ng COC para sa pagka-bise presidente ay si Bong Go ang naghain, imbes na pagka-presidente na orihinal na plano ng partido.

Hindi yata agad nagawa ang script kung sino ang dapat maghain ng COC para sa pagka-presidente kaya dalawang oras bago matapos ang COC filing ay tinawagan ng PDP-Laban si Bato dela Rosa para maghain ng kanyang COC sa pagka-pangulo.

Aminado si Bato na handa siyang i-substitute kaya ang iniisip ng mga tao ay si Go ang magsu-substitute sa kanya at si Duterte naman ang magsu-substitute kay Go sa pagka-bise presidente.

Isa pang opsyon na puwedeng gawin ng PDP-Laban ay si Mayor Sara Duterte-Carpio ang magsu-substitute kay Bato at mukhang nagsiguro rin ang Lakas-CMD na sakaling ayaw ni Mayora sa PDP-Laban ay puwede niyang i-substitute ang ­pinaghain ng partido ng COC para sa pagka-presidente.

Diyan pa lang, parang pinaglalaruan na ng self-proclaimed leaders ang batas kaya kung ang isang simpleng batas ay hindi nila kayang sundin, paano na ang mga mas seryosong batas?

Dapat maging ehemplo ang self-proclaimed ­leaders pero sa ginagawa nila mukhang hindi sila magandang ehemplo.

Pero sa tingin ko, hindi na ubra ang drama ng PDP-Laban dahil bagama’t mahilig sa drama ang mga Pinoy, madalas din sila nauumay kapag pare-pareho ang kuwento ng pinapanood nilang drama.

Bumenta na ang kadramahan ni Duterte noong 2016 kaya ang palagay ay magpa-flop ang panibago nilang drama lalo na’t hindi naman kasiya-siya ang nangyari sa bansa sa panahon ng kanilang panunungkulan.

Meron din history na hindi pa pinauulit ng mga Filipino ang mga nakaupong adminis-trasyon. Tingnan n’yo ang nangyari sa Liberal Party (LP) na nangarap na manatili sa kapangyarihan sa loob ng 18 taon, hindi nangyari!

Read More

EPAL TIME!

0

SA tuwing may pananalasa ng delubyo, karaniwang eksena ang mga papansing politikong ihayag sa publiko ang kanilang pagtulong sa mga nasalantang Pilipino. Kodak dito, Kodak doon sa hangaring lumanding sa mga pahina ng pahayagan o bahagi ng programa sa ­telebisyon.

Sa pag-inog ng panahon, mas nakilala sila sa taguring epal o yaong abala sa pagsawsaw sa tuwing may pagkakataon sa hangarin magpapansin sa publiko bilang bahagi ng kanilang paghahanda sa nalalapit na halalan.

Ang siste, marami sa mga epal ay yaong mga mismong nakaupo sa gobyerno. Ang masaklap, ‘di nila pera ang ipinantutustos sa mga anila’y ‘tulong’ na ipinaabot sa biktima ng delubyo.

Sa pananalasa ng bagyong Maring sa mga lugar na may mataas na bilang ng botante, asahan ang kani-kanilang diskarte. Mga relief goods na pake-pakete, asahan nating may kalakip na pangalan at pagmumukha ng mga aspirante.

Kung tutuusin, wala silang karapatang magpabida lalo pa’t perang ginamit ‘di naman galing sa kanilang bulsa. Pero ‘yan ang kalakaran at matagal na panahon nang nakagawian.

Halaw sa salitang mapapel, ang epal ay ­yaong hindi nahihiyang ipagyabang ang ano mang mayroon siya – kapirasong tulong katumbas ang publisidad na dumadagundong. Sila rin yaong nagmamarunong. Panay-panay ang sawsaw sa mga usaping lipunan sa hangaring mapansin ng sambayanan.

Naglalakihang tarpaulin sa kahabaan ng mga malalapad na daanan, mga mukhang nakapaskil sa mga sasakyan, mga give-aways na kalakip ang kanilang pangalan, at marami pang gimik na tiyak na kasusuklaman.

Kung tutuusin, hindi barya ang kanilang puhunan sa hangaring manatiling lutang ang kanilang pangalan. Maging sa social media, kumuha pa ng mga bayaran para lang mapag-usapan.

Sa paglisan ng bagyong Maring, marami na ang nauna sa paandar na tulong nila. Pero ‘wag ka… ang perang ginamit ay buwis ng masa.

Sa mga nalalabing buwan ng taon, tiyak na marami pang bagong dadaong. Sa bawat bagyo, may dadayo – politiko kasama ang kanyang hukbong panay lang ang kuha ng litrato. But wait there’s more, ang kanilang maagang pambobola, may kasama pang kalendaryong pirmado.

Sa mga wala sa pwesto, puhunan ang bawat sentimo. Sa pag-upo nila ay tiyak din namang kakambyo. Hindi nila hangad na magbawi. Ang pakay nila’y kumita nang malaki.

Ang kultura ng pulitika, sadyang para lang sa may kaya.

Read More

QUEZON GOV. SUAREZ, ABOGADANG ANAK NASA HOT WATER

0

KAPAG napatunayan, posibleng ma-disbar ang abogadang anak ni Quezon Governor Danilo Suarez na si Atty. Joana Suarez at suspensyon naman laban kay Gov. Suarez dahil sa ginawa umanong pag-areglo o panunuhol ng mag-ama sa menor de edad na biktima upang iurong nito ang isinampang mga kasong kidnapping and serious illegal detention with rape, laban kay Lopez, Quezon Municipal Councilor Arkie Manuel Ortiz-Yulde.

Sa limang pahinang complaint affidavit ng pamilya ng biktima na isinampa sa office of the Ombudsman (OMB), inireklamo nila ang mag-amang Governor Danilo Suarez at Atty. Joana Suarez ng obstruction of justice, accessory to the crime of child abuse at paglabag sa Paragraph (e) sa Section 3 ng Republic Act 3019 o Anti-Graft and Corrupt Practices act.

Kabilang na rito ang mga reklamong administratibo o grave abuse of authority, grave misconduct, dishonesty, oppression, at paglabag sa Paragraph (a, b and c) under Section 4 ng RA 6713, laban kay Gov. Suarez.

Katuwang naman ng batang biktima at ina nitong si Rose Rosario Tapiador, 53-anyos, sa pag­hahain ng kaso sa Ombudsman nito lamang October 7, 2021, ang grupong Citizens Movement Against Corruption, Crime, Illegal Drugs and Gambling, Inc., sa pangunguna ni Prop. Salvador Singson-de Guzman.

Sa reklamo na inihain ng ina ng batang biktima, hiniling nito sa Ombudsman ang agarang aksyon laban kay Gov. Suarez at anak nito upang mapigilan ang mga respondent na maipluwensyahan ang kanilang kaso laban kay Konsehal Yulde.

Nakasaad sa complaint affidavit ni Rosario Tapiador sa Ombudsman, na pilit inaareglo ni Governor Suarez sa pamamagitan ng kanyang anak na si Atty. Joana Suarez, ang nabanggit na mga kaso laban kay Councilor Yulde na pinatotohanan naman ni Anamarie Santiago na siyang kasama ni Atty. Suarez nang magtungo ito sa bahay ng pamilya ng biktima.

Ayon sa sinumpaang salaysay ni Anamarie Santiago, siya ay pinsan ni Rose Tapiador, ina ng batang biktima, siya ang nagturo at kasama ni Atty. Suarez nang magtungo sa bahay ng pamilya Tapiador sa Pasig City, at nakaharap siya at narinig niya nang alukin umano ni Atty. Suarez ng P3 milyon ang biktima kapalit naman ng pag-urong nito sa inihaing kaso laban kay Councilor Yulde.

Na ang paunang bayad aniya ay P2 milyong cash at ang balanse na P1 milyon naman ay ibibigay ni Atty. Suarez kapag pumirma na ang biktima ng affidavit of desistance; subalit hindi umano nagtagumpay si Atty. ­Suarez dahil tumanggi ang biktima at nanindigan siyang hustisya ang kailangan niya, hindi pera.

Naganap umano ang tangkang pang-areglo o panunuhol ni Atty. Suarez sa biktima noong Setyembre 25, 2021.

Samantala, inakusahan din ni Anamarie Santiago si Gov. ­Suarez ng pagpapadukot sa kanya noong madaling araw ng Setyembre 22.

Kuwento ni Anamarie, dakong alas-2 ng madaling araw noong Setyembre 22, natutulog siya sa kanilang nirerentahang bahay sa Malabon City kasama ang kinakasama niyang si Rodel, nang may biglang kumatok sa pintuan ng kanilang bahay.

Pagbukas umano ni ­Anamarie ng pintuan kaagad na pumasok sa loob ng bahay nila ang tatlong armadong lalaki na naka­suot ng bonnet.

Kaagad umano siyang hina­wakan sa braso ng isa sa mga armadong kalalakihan at sinabihan siyang sumama nang maayos sa kanila dahil ipinasusundo siya ni Governor Suarez.

Bago umano sila umalis ay binantaan pa umano ng tatlong dumukot sa kanya ang kanyang kinakasama na huwag itong magsusumbong sa pulis at sa kahit kanino dahil papatayin nila si Anamarie kapag ginawa niya iyon.

Sinabi ni Anamarie na ka­agad siyang isinakay sa ­isang sasakyang van na kulay puti at nakita niya sa loob ng sasakyan ang hipag niyang si Myrna na taga Mauban, probinsya ng Que­zon, na siya umanong nagturo sa kanyang kinaroroonan, dinala umano siya sa kapitolyo ng Quezon at doon siya pansamantalang ikinulong.

At noong Setyembre 24, 2021, aniya ay dumating si Gov. Suarez sa kapitolyo at naka­usap niya ito, kung saan inatasan umano siya ni Gov. Suarez na tulungan sila upang makalabas ng kulungan si Councilor Yulde dahil kailangan niya umano si Councilor Yulde para sa pagsasampa ng kaso sa Ombudsman laban kay Engr. Tan ng DPWH sa Region 1.

Pinakiusapan umano siya ni Gov. Suarez na samahan ang anak nito na si Atty. Joana Suarez sa tinutuluyang bahay ng pamilya Tapiador dahil sa batid ni Gov. Suarez na alam ito ni Anamarie.

Ayon naman kay Prop. De Guzman, ang pahayag ni Ana-marie Santiago ay isang matibay na basehan upang mapanagot sa kaso si Governor Suarez at anak niyang si Atty. Joana Suarez, dahil malinaw na nais nilang pagtakpan ang mga kaso ni Yulde sa publiko, at ito ay isang malaking paglabag sa itinatadhana ng batas.

Nauna nang kinasuhan ng batang biktima ang akusadong si Municipal Councilor Arkie Manuel Ortiz-Yulde ng Lopez, Quezon, sa Provincial Prosecutor’s Office ng Rosales, Pangasinan, sa tulong na rin ng grupo ni Prop. De Guzman noong Mayo 14, ng kidnapping at paulit-ulit na panghahalay sa batang Tapiador na nangyari sa loob ng isang hotel sa Rosales, Pangasinan, mula Abril 17 hanggang Abril 22, 2021.

Kaagad namang inaksyunan ito ni Assistant Provincial Prosecutor Ramil J. Lopez at nagpalabas ito ng resolution at information kaugnay ng mga nasabing kaso at isinampa ito sa Regional Trial Court ng Rosales, Pangasinan.

Dahil dito, nagpalabas naman ng dalawang mandato de aresto si Judge Roselyn Andrada-Borja ng RTC Branch 53 ng Rosales, Pangasinan, noong Setyembre 15, 2021. Ito’y para sa mga kasong kidnapping and ­serious illegal detention with rape na may Criminal Case No. 7345-R at paglabag sa Section 5 (b) Article 111 ng Republic Act No. 7610 na may Criminal Case No.7344-R, laban kay Yulde na walang kaukulang piyansa.

Noong Setyembre 20, 2021 naman ay inaresto si Councilor Yulde ng pinagsanib na puwersa ng Criminal Investigation and Detections Group, sa pamumuno ni Lt. Col. Ariel Huesca, at mga pulis ng Lopez at Catanauan Municipal Police Stations, 1st Quezon Provincial Mobile Force Company at Regional Mobile Force Battalion ng Region 4-A.

Samantala, sa kasalukuyan ay nailipat na aniya sa Pangasinan Provincial Jail si Councilor Yulde, ito’y kasunod na rin nang ipinalabas na kautusan ng hukuman, kung saan naisampa at diringgin ang naturang mga kaso laban kay Yulde.

Read More