Category: PROBINSIYA

LAGUNA – Sinibak sa serbisyo ang isang police colonel nang magpositibo sa isinagawang random drug testing ng Police Regional Office Calabarzon noong Mayo 19, 2021.

Ayon kay Calabarzon Police Regional Director Brig. Gen. Eliseo DC Cruz, bagong lipat lamang sa PRO4-A si P/Lt. Col. Marlou Dumagat Besona nang magpositibo ito sa ilegal na droga.

Agad nagsagawa ng administrative proceedings kay Besona at napatunayang guilty sa paggamit ng ilegal na droga na nagresulta sa hatol na ‘dismissal from the service.’

Hindi na naghain ng motion for reconsideration si Besona kaya epektibo na ang pagkakasibak niya sa serbisyo simula noong Hulyo 12, 2021.

Matatandaan, iniutos ni Philippine National Police chief, Gen. Guillermo Eleazar ang maigting na pagpapatupad ng “Intensified Cleanliness Policy” sa hanay ng pulisya. (CYRILL QUILO)

Read More

QUEZON – Patay ang isang 52-anyos na ginang matapos na tadtarin ng saksak sa loob mismo ng kanyang bahay sa bulubunduking barangay sa bayan ng Padre Burgos, sa lalawigang ito.

Noong Lunes ng umaga nang madiskubreng wala nang buhay ang biktimang si Imelda Santos habang nakabulagta sa ibabaw ng cabinet sa loob ng kanyang bahay sa Barangay Yawe.

Tadtad ng mga tama ng saksak sa katawan ang biktima na nagresulta sa agaran nitong pagkamatay.

Hinala ng pulisya, pagnanakaw ang motibo ng suspek na posibleng nakilala ng biktima kaya pinatay ang huli.

Napag-alaman, mag-isang natulog ng nagdaang gabi sa kanilang bahay ang ginang dahil may pinuntahan ang mister at mga anak nito.  Malayo sa mga kapitbahay ang bahay ng pamilya.

Patuloy ang imbestigasyon ng mga awtoridad sa insidente. (NILOU DEL CARMEN)

Read More

CAVITE – Isang preso ang namatay sa Custodial Center ng Bacoor City noong Lunes ng hapon.

Kinilala ang biktimang si Pedro Villatura, 66, nahaharap sa kasong paglabag sa Sec. 5 at 11 ng RA 9165 (Comprehensive Dangerous Drugs Act of 2002).

Ayon sa ulat ni P/SSgt. Edison Fetalcurin ng Bacoor City Police Station, dakong alas-6:50 ng gabi nang nakaramdam ng hirap sa paghinga si Villatura dahilan upang isugod sa Las Piñas General Hospital and Satellite Trauma Center ngunit binawian ng buhay habang nilalapatan ng lunas. (SIGFRED ADSUARA)

Read More

LAGUNA – Umakyat na sa 17 kaso ng Delta variant ng COVID-19 ang natukoy sa lalawigang ito, ayon sa ulat ng Provincial Health office nitong Martes.

Naitala ang nasabing bilang matapos lumabas ang resulta sa isinagawang genome sequencing makaraan ang halos tatlo hanggang apat na linggong paghihintay.

Hindi na tinukoy kung saang lugar nagmula ang mga pasyenteng nagkasakit.

Sinabi ni Provincial Health Officer Dr. Rene Bagamasbad, nakarekober na ang mga pasyente ngunit isasailalaim pa rin sa swab test para mahanap ang kanilang mga naging close contact.

Samantala, minamadali na ang pagbabakuna sa lungsod ng Calamba upang maabot ang herd immunity.

Ayon kay Calamba City Health Officer Dr. Adelino Labro, target ng lokal na pamahalaan na makapagbakuna ng halos 4,000 indibidwal kada araw alinsunod sa direktiba ng Department of Health

Kaugnay nito, inumpisahan na ang pagbabakuna ng single dose na Jansen (Johnson & Johnson) para sa mga senior citizen at may comorbidities o kabilang sa A2 Priority Group.

Sa huling talaan ng Calabarzon COVID Tracker noong Hulyo 21, mayroon nang kabuuang 1,991,625 indibidwal ang nakakumpleto sa una at ikalawang dose ng bakuna, habang 681,461 senior citizens na ang nabakunahan at 582,268 indibidwala na may comorbidities ang nabakunahan. (CYRILL QUILO)

Read More

NAPATAY ng mga tauhan ng PNP-Police Regional Office 5 ang dalawang hinihinalang mga miyembro ng New People’s Army (NPA) nang paputukan ng mga rebelde ang mga awtoridad makaraang sitahin sa pagsusulat ng “DUTERTE IBAGS” sa pader sa Brgy. Lower Binogsacan, Guinobatan, Albay noong Lunes.

Ayon kay PNP-PRO5 Regional Director Jonnel C. Estomo, bahagi ng pagsisikap ng PNP na matiyak ang kaligtasan na mga Bicolano sa pagsasagawa ng police and mobile visibility sa buong sulok ng rehiyon.

Dahil naka-full alert ang buong PNP kaugnay sa huling State of the Nation Address ni Pangulong Rodrigo Roa Duterte, puspusan ang security patrol ng pinagsanib na pwersa ng 1st Albay PMFC; Guinobatan MPS; CIDG Albay PFU; RMFB5; RIU5; Albay PIU; 93rd SAC SAF; RSOU5, at maging ang mga kawani ng 97TH MICO PA; 49TH 1B, 9th ID, Philippine Army, at 2nd Albay PMFC sa nabanggit na lugar.

Ayon sa ulat, nangyari ang sagupaan dakong alas-1:00 ng madaling araw noong Hulyo 26, 2021 sa pagitan ng dalawang hindi kilalang lalaki at mga pulis sa Brgy. Lower Binogsacan, sa bayan ng Guinobatan.

Sa isinumiteng ulat ng Albay Police Provincial Office, sa pamumuno ni P/Col. Arnold C. Santiago, Provincial Director, kay P/BGen. Estomo, habang nagpapatrolya at nagsasagawa ng Oplan Sita ay namataan ng mga operatiba ang mga lalaking nagbabandalismo at nagpipinta ng mga katagang “DUTERTE IBAGS” gamit ang pulang spray paint sa kongkretong barandillo malapit sa Banao Bridge ng naturang bayan.

Nagulantang ang mga ito nang maaninag ang paparating na pwersa ng gobyerno at nagpaputok sa direksyon ng mga awtoridad. Bunsod nito, tinamaan ng dalawang beses ang sasakyang pangpatrolya ng PNP.

Dahil sa posibleng panganib, napilitang gumanti ng putok ang mga operatiba na nagresulta sa pagkamatay ng dalawang suspek.

Narekober sa pinangyarihan ng insidente ang isang kalibre .45, isang kalibre .38 revolver, isang motorsiklong walang plaka, at iba’t ibang mga bala.

“Katulad ng aking mga naunang sinabi, ang PNP Bicol ay 24-oras na nakamatyag at nakabantay sa ating pamayanan. Ano mang oras at panahon, nakahanda ang kapulisan na umagapay at magbigay serbisyo upang mapigilan ang paglaganap ng kriminalidad sa ating pamayanan,” ayon kay P/BGen. Estomo.

Samantala, arestado sa ikinasang law enforcement operation ng PNP-Police Regional Office 5 ang isang aktibong miyembro ng New People’s Army (NPA) sa bisa ng warrant of arrest noong Lunes ng umaga sa Sitio Patag, Brgy. Buenavista, San Fernando, Masbate.

Nadakip ang suspek na kinilalang si si Pio Cardeño y Canale, alyas “Hapon,” 38, residente ng nabanggit na lugar, sa kasong multiple attempted murder, sa inihaing warrant of arrest na inisyu ng RTC Branch 50, Fifth Judicial Region, San Jacinto, Masbate noong Pebrero 23, 2021.

Inirekomenda ng korte ang pyansang P120,000 para sa pansamantalang paglaya ni Cardeño.

Si Cardeño ay miyembro umano ng Sangay ng Partido Lokalidad (SPL) sa ilalim ng Militia ng Bayan, Larangan 1, Komite ng Partido, Bicol Regional Party Committee.

Sinasabing kabilang si Cardeño sa 19 na itinuturong mga suspek sa pananambang at pagpapasabog gamit ang improvised explosive device (IED), sa mga kawani ng Bravo Company, 2nd IB, 9th ID, Philippine Army noong Hunyo 2, 2019 sa Sitio Kawayan, Brgy. Cañelas, San Fernando, Masbate habang nagsasagawa ng foot patrol at barangay visitation.

Nagresulta ang nasabing pag-atake ng mga rebelde sa matinding pagkasugat ng dalawang sundalo.

Kaugnay nito, pinuri ni P/BGen. Estomo, Regional Director ng PNP-PRO5, ang pagpupursige ng PNP Bicol upang arestuhin at dalhin sa hukuman ang mga may nagawang pagkakasala sa batas katulad ng nasabing suspek.

“Kasabay ng ating pagnanais na gawing mas ligtas ang ating pamayanan ay ang mas pinaigting na programa at aktibidad ng PNP Bicol katuwang ang Philippine Army upang tuluyan nang lipunin ang mga masasamang loob at pigilan ang iba pang mga opensibang paglulunsad nito na maaaring magdulot ng matinding panganib sa pangkalahatang kaligtasan ng ating mamamayan. Kami ay hindi papatinag, kasama ang komunidad at stakeholders, itutuloy natin ang ating mga nasimulan para sa isang mas mapayapa at maunlad na komunidad,” pahayag ni RD Estomo. (JESSE KABEL)

Read More

TINATAYANG nasa P40-milyon halaga ang inisyal na naitalang nasira sa mga pananim at palaisdaan kabilang ang pampublikong imprastraktura habang hindi bababa sa 2,000 residente mula sa 515 pamilya sa 12 bayan at siyudad sa lalawigan ng Bulacan ang inilikas matapos malubog sa baha dulot ng hanging habagat at bagyong Fabian na sinabayan pa ng high tide mula sa Manila Bay.

Umabot hanggang 5ft. ang floodwater na nagpalubog sa mahigit 100 barangay dahil sa halos isang linggong pag-ulan, ayon sa pinakahuling ulat ng Bulacan Provincial Disaster Risk Reduction Management Office (PDRRMO).

Nagpakawala rin ng tubig ang dalawa sa tatlong dam sa nasabing lalawigan kung saan 210 cubic meter per second (cms) ang ni-release ng Bustos Dam nitong Linggo makaraang umabot sa 17.36 meters ang water level elevation nito na lagpas sa 17.00 meters spilling level.

Ang Ipo Dam ay nagpalabas din ng tubig na umabot pa sa 116.31 cms hanggang 5:00 pm ng kaparehong araw matapos nitong lampasan ang spilling level na 101.00 meters at umabot sa 101.40 hanggang 101.07 meters.

Ayon kay Governor Daniel Fernando, inilikas ang may 2,000 residente mula sa 515 pamilya sa lungsod ng Malolos kung saan ang Barangay Bulihan ang siyang may pinakamataas na tubig baha na hanggang 5ft. habang ang mga bayan ng Hagonoy, Paombong, Bulakan at Calumpit, Guiguinto, Plaridel, Bocaue, Obando, siyudad ng Meycauayan, Norzagaray at Marilao kasama rin ang bayan ng Balagtas, Sta. Maria ay apektado rin ng baha. Mayroon din sa mga ito na inabot ng hanggang 3ft. ang taas ng tubig.

Nasa 13 barangay naman ang binaha sa Bocaue, 24 sa siyudad ng Malolos, 4 sa Plaridel, 14 sa Paombong, 17 sa Calumpit, 11 sa siyudad ng Meycauayan, 4 sa Guiguinto at mayroon din sa mga bayan ng Bulakan, Hagonoy, Marilao, Norzagaray at Obando.

Nabatid pa na ang Macaiban bridge sa Sta. Maria ay hindi madaanan ng lahat ng uri ng sasakyan gayundin sa Barangay Sta. Cruz sa bayan ng Guiguinto at Barangay Iba sa Marilao at Barangay Saluysoy sa Meycauayan. Ang Lias, Marilao road ay hindi rin madaanan ng lahat ng light vehicles.

Nagtala ng inisyal na halagang P5 milyon na nasirang imprastraktura ang Bulacan First District Engineering Office habang inisyal namang P14.3-milyon naman sa District 2 Engineering Office at nasa mahigit P19-Milyon ang halaga ng inisyal na naitalang nasira sa mga pananim na gulay, palay, at sa mga palaisdaan.

Sinuspinde rin ni Gob. Fernando ang pasok sa Kapitolyo nitong Lunes base sa rekomendasyon ni PDRRMO chief Liz Mungcal para sa kaligtasan ng mga empleyado na apektado ng baha sa kanilang mga lugar.

Gayunpaman, ayon kay Fernando, mananatiling may pasok ang essential functions sa mga mayroong delivery of basic and health services, response to disasters and calamities, at iba pang vital services para maihatid ang services sa mga Bulakenyo.

Tuloy-tuloy rin ang isinasagawang vaccination activity sa Hiyas ng Bulacan Convention Center. (ELOISA SILVERIO)

Read More

UMABOT sa 47 katao ang nasagip sa gitna ng karagatan sa kasagsagan ng pagbuhos ng malakas na ulan dulot ng Bagyong Fabian at habagat sa magkahiwalay na rescue operation ng Philippine Navy sa Basilan at Philippine Coast Guard sa Surigao del Norte.

Ayon kay Naval Task Group-Sulu at 4th Marine Brigade Commander, Colonel Hernanie Songano, nakatanggap sila ng tawag hinggil sa kalagayan ng 18 katao na sakay ng “MB Bongarita” na sinalpok ng malalaking alon kaya agad silang nagpadala ng Navy vessel para magsagawa ng rescue mission.

Ang bangkang “MB Bongarita” ay nagmula sa Barangay Kanaway sa Parang, Sulu at papunta ng Malamawi Island sa Basilan nang makasagupa ang malalaking alon sa area ng Bakungan Island, Patikul at Tambanan Island, Luuk sa Sulu.

Dinala ang mga pasahero na may kasamang anim na bata sa Luuk Hospital at matapos na malapatan ng lunas ay isinakay sa Army Special Forces military truck at inihatid sa bayan ng Parang.

“Around 2:10 pm, we received a report that there was a boat in distress. I immediately dispatched the Multi-Purpose Assault Craft (MPAC) BA487 to proceed to the said area. Upon the arrival at the location MB Bongarita was being towed by a civilian watercraft. However, the responders cannot withstand the strong wind which made the passengers of MB Bongarita to transfer to MPAC for their safety,” ani Col. Songano.

Kaugnay nito, inihayag ni Joint Task Force Sulu Commander MGen William N. Gonzales ang pagpuri sa ginawa ng JTF’s command. “Last week we have also rescued passengers from a capsized boat using our Navy’s watercraft. For this, I commend the sailors and the marines for their sustained readiness and dedication to duty that repeatedly saved the lives of our brothers in need.”

Samantala, nasagip ng Philippine Coast Guard sa Surigao del Norte ang 26 pasahero at 3 crew ng isang tumaob na bangka nitong nakalipas na linggo.

Ayon sa imbestigasyon, bandang tanghali nang makatanggap ang Coast Guard Surigao del Norte ng impormasyon mula sa isang miyembro ng Philippine National Police (PNP) Maritime Group hinggil sa tumaob na motor banca sa may Bucas Grande Island, Socorro.

Alas-9:00 ng umaga noong Sabado nang umalis ang bangka na may sakay na 26 pasahero at 3 crew para sa isasagawang team building sa Sohoton, Socorro.

Habang bumabiyahe papunta sa destinasyon, bigla silang nakaranas ng hindi magandang kondisyon ng dagat, malalaking alon at strong current dahilan upang tumaob ang motor banca sa pagitan ng Port of Hayanggabon at Light Station sa Dahakit, Socorro.

Pagkatapos matanggap ang impormasyon, agad nagresponde ang Coast Guard Sub-Station Claver at PNP Maritime Group sa lokasyon at nagsagawa ng Search and Rescue (SAR) operation sakay sa MBCA Marian at sinundan ng MBCA Zac Greggor.

Pagdating nila sa lugar, agad inilipat sa kanilang sasakyan ang mga nasagip at dinala sa Port of Hayanggabon habang ang tumaob na motor banca kasama ang kanilang staff ay dinala sa Coast Guard Substation para sa dagdag na imbestigasyon. (JESSE KABEL)

Read More

“DRUGS is like a rat in a maze. It aims for a common hole, hoping for a quick relief but it’s actually a trap,” pahayag ni PNP-Zambales

Provincial Director PCol. Romano V. Cardiño, sa pakikipagpulong sa mga kabataan hinggil sa drug addiction, matapos madakip ang notoryus na tulak na ilegal na droga sa kanilang lalawigan.

Ayon kay Col. Cardiño, nitong nakalipas na linggo ay nadakip ng kanyang mga tauhan ang suspek na kinilalang si Jecar Alonzo Barker, top 5 most wanted person dahil sa kasong paglabag sa RA 9165 (Comprehensive Dangerous Drugs Act of 2002), sa tinutuluyan nito sa Purok 4, Brgy. East Dirita, San Antonio, Zambales.

Sa bisa ng warrant of arrest na inilabas ng korte ay isinagawa ng PNP-Zambales-San Antonio MPS at 305th Regional Mobile Force Battalion 3, 2nd platoon, sa pamumuno ni P/Lt. Mark B. Almero, ang law enforcement operation sa Purok 4, Brgy. East Dirita, San Antonio, Zambales na nagresulta sa pagkakadakip sa suspek.

Nabatid na bago isinilbi ang warrant of arrest na inisyu ni Presiding Judge Santiago Beltran Jr., ng RTC Branch 69, 3rd Judicial Region, Iba, Zambales, ay nagsagawa muna ng surveillance and intelligence operation ang mga tauhan ni Col. Cardiño laban sa suspek.

“My governance has always been geared towards the interest of the beleaguered. The most convenient prey of drugs are the poor people in the downline, though it also did not spare the upper class.

PNP Zambales would like to leave a mark in the province that it exhausted all efforts to fight the drug menace,” pahayag ni Col. Cardiño.

Pansamantalang inilagay sa temporary custody ng San Antonio MPS ang suspek. (JESSE KABEL)

Read More

PATAY ang tinaguriang notoryus na drug dealer at isang kasama nito sa ikinasang anti-narcotics operation ng magkatuwang na pwersa ng PNP-Police Regional Office 5 at Philippine Drug Enforcement Agency-Regional Office 5 sa Labo, Camarines Norte

Ang nasabing operasyon ay bilang pagtalima sa direktiba ng pamunuan ng PNP sa pamumuno ni P/Gen. Guillermo Lorenzo T. Eleazar, kaugnay  sa ipinatutupad na “Internal Cleanliness Policy in the Community.”

Kinilala ang napatay na mga suspek na si Reynaldo Esguerra, 44, may asawa, at residente ng Brgy. Alawihao, Daet, Camarines Norte, at ang kasama nitong si alyas “Muslim.”

Ayon sa ulat, nagkasa ng buy-bust operation ang mga tauhan ng Regional Police Drug Enforcement Unit 5; PIU/PPDEU Camarines Norte PPO; IMEG-SOU; RID5-RSOU; 501st MC RMFB5; 2nd CNPMF; at MPDEU ng Labo MPS kasama ang PDEA ROV noong Sabado ng gabi.

Sa nasabing operasyon, ang poseur buyer ay nakipagkita sa itinakdang lugar ng mga suspek sa Brgy. Talobatib, Labo, Camarines Norte kung saan nangyari ang palitan ng 25 gramo ng hinihinalang shabu at kabayarang P150,000 salapi.

Ngunit matapos ang transaksyon ay nagduda si Esguerra nang makita ang papalapit na mga operatiba sa kinaroroonan nila.

Bunsod nito, bumunot ng baril si Esguerra at itinutok sa poseur buyer. Sa gitna ng pagtatangka nitong barilin ang pulis ay hinimok itong sumuko nang maayos ngunit nagmatigas ang suspek.

Gamit ang .45 kalibreng pistola, pinaputukan nito ang nasabing tropa na naging sanhi ng pagganti ng putok ng mga awtoridad.

Sa gitna ng komosyon, nakatakas ang suspek at kasama nitong si alyas “Muslim” sakay ng isang kotse.

Agad namang naglatag ng checkpoint at dragnet operation ang pulisya ng mga bayan ng Capalonga at Sta. Elena para hulihin ang mga suspek hanggang sa masukol ang mga ito at napatay ng mga awtoridad.

Napag-alaman na si Esguerra ay isang drug dealer sa Region 4-A partikular na sa probinsya ng Rizal.

Ito umano ay nagtungo ng Camarines Norte noong 2019 upang magtago nang mamatay ang amo nito.

Sa probinsya ng CamNorte nito itinuloy ang ilegal na aktibidad sa pamamagitan ng pagsu-supply ng droga sa lugar ng Daet, Labo, Jose Panganiban at Paracale na ibinabiyahe mula pa sa Taguig City gamit ang iba’t ibang sasakyan.

Umaabot umano sa 150 gramo ng shabu ang naipamumudmod nito kada linggo sa nabanggit na mga lugar.

Binigyan naman ng pagkilala ni P/BGen. Jonnel C. Estomo, Regional Director ng PNP-PRO5, ang mga operatiba sa matagumpay na operasyon. Aniya, walang pinipiling oras o lugar ang kampanya kontra ilegal na droga.

Lagi aniyang handa ang pulisya sa pagtugis sa mga suspek upang panagutin sa batas sa ilegal nilang gawain. (JESSE KABEL)

Read More