Author: jake

PORMAL nang inendorso ng mga kasapi ng Partido Federal ng Pilipinas (PFP) ang kandidatura ni dating Senador Ferdinand “Bongbong” Marcos Jr., para sa 2022 presidential elections.

Kasabay ng ginanap na PFP National Convention sa bayan ng Tupi sa lalawigan ng North Cotabato, nagpaabot naman ng suporta ang mga prominenteng politikong nabibilang sa tinaguriang “Solid South,” na kumakatawan sa mga rehiyon, lalawigan, distrito, lungsod, munisipalidad at barangay sa Mindanao.

Sa isang resolusyong pirmado ng mga kasapi ng PFP, pinagtibay ng kasapian ang pagsusulong kay Marcos bilang pambato ng Solid South sa papalapit na halalang gaganapin naman sa Mayo 2022.

Ayon kay Atty. George Briones na tumatayong PFP General Counsel, ang nasabing resolusyon ay binalangkas at inaprubahan batay na rin sa kahilingan ng mayoryang kasapi ng partido.

“Ipanalangin po natin si Senator Bongbong Marcos para makagawa siya ng tamang desisyon dahil ‘di po madaling tumakbo na presidente ng Pilipinas lalo na sa panahon ngayon,” ani Briones.

Pag-amin ni Briones, hindi niya personal na kilala ang dating senador at sa kumbensyon lamang niya nakaharap sa unang pagkakataon. Paglalarawan pa niya, si Marcos ay may angking talino, respeto sa kapwa tao, hindi palamura at mabiro – mga katangian anilang hanap ng PFP sa kanilang hinahanap na Pangulo.

“Lahat kami may notebook, may fountain pen, sumusulat po kami. Siya (Bongbong) din meron, pinag-aaralan niya ang Partido Federal ng Pilipinas,” saad pa ni Briones.

Ipinagmalaki rin ni Briones ang PFP na bagamat tatlong taon pa lamang, angat sila kaysa sa ibang partido dahil wala ni isa aniya sa 1.5 milyong kasapi ang pabigat o yaong may bahid katiwalian.

Taong 2018 nang ganap na kilalanin ng Commission on Elections (Comelec) ang PFP bilang isang national political party. Sa 1.5 milyong kasapi ng bagitong partido, 300 sa kanilang mga inilaban bilang kandidato para sa iba’t ibang posisyon sa iba’t ibang panig ng Mindanao ay nagsipagwagi noong 2019 midterm elections.

Aniya, patunay ito na mayroong Solid South na kinabibilangan hindi lamang ng mga politiko kundi maging ng mga kabataan, propesyonal at mga kinatawan ng iba’t ibang sektor ng lipunan.

Bahagi ng plataporma ng PFP ay ang pagsusulong ng isang bansang malayo sa droga, rebelyon, katiwalian at gutom.

Kaugnay nito, nanatiling bakante ang pwesto ng chairmanship ng partido dahil inilalaan anila ito kay Marcos sa sandaling manumpa na ito bilang miyembro.

“Kung mag-decide si Senator Bongbong Marcos na sumapi sa Partido Federal ng Pilipinas and he will take his oath as a member of PFP, tatawag po tayo ng another national convention bago po matapos ang buwan ng September where he will be nominated as the official candidate of the PFP for president,” dugtong pa ni Briones.

IMINUNGKAHI ni Senador Win Gatchalian sa Inter-Agency Task Force for the Management of Emerging Infectious Diseases (IATF-EID) at local government units (LGUs) ang pagbibigay ng sapat na abiso sa mga lugar na ilalagay sa granular lockdown pati na rin ang pagpapatupad ng bagong alert level system upang mapaghandaan ito ng mga apektadong indibidwal o mga negosyo.

“I am in favor of granular lockdown as long as the public is informed in advance para makapag plano sila. Like for example, kung bababa tayo to alert level 3, yung capacity ng restaurants at 50% al fresco obviously kailangan mo ng mas maraming waiter. Papapasukin mo yung mga waiters mo. Hindi pwedeng surprise announcement ‘yan kasi kawawa yung mga negosyo and this alert level is really meant for economic activity,” ani Gatchalian.

Sang-ayon ang Senate Economic Affairs Vice Chairperson sa prinsipyong isinusulong sa mga bagong patakaran na naglalayong unti-unting buksan ang ekonomiya habang pinangangasiwaan ang kasalukuyang krisis sa kalusugan.

“This is really a balancing act. Kahit mataas ‘yung COVID-19 cases, nakakapag trabaho na ‘yung mga kababayan natin. Now the areas that should be open or not are pinpointed. But the public needs to be informed in advance because how can you plan? It has to be broadcast ahead of time so that ‘yung mga negosyo, pwede silang magplano,” paliwanag ni Gatchalian.

Sa panuntunang inilabas ng IATF noong Setyembre 13 para sa paunang implementasyon ng alert levels system sa National Capital Region (NCR), iniatang sa mga city at municipal mayors ang pagpapatupad ng granular lockdown kung kinakailangan sa kanilang mga nasasakupang lugar sa loob ng 14 na araw o mas mababa pa. (ESTONG REYES)

HINDI pa man ganap na naisasara ng Kongreso ang imbestigasyon sa mga umano’y katiwalian kinasasangkutan ni dating Undersecretary Christopher Lloyd Lao at mga Tsinong nasa likod ng Pharmally Pharmaceutical Company, pormal nang inihain na sa Kamara ang isang panukalang nagsusulong sa pagbuwag ng Procurement Service of Department of Budget and Management (PS-DBM) na dating pinamumunuan ng kontrobersyal na opisyal.

Sa House Bill 10222 na inihain ni Deputy Speaker Rufus Rodriguez, inatasan din ang lahat ng national government agencies – kasama na ang state-owned or controlled corporations, colleges and universities at local government units (LGUs) na sila na mismo ang bumili ng kanilang mga kailangang supplies.

“Many issues and controversies, the most recent of which was the transfer of P42 billion by the Department of Health for face shields, face masks, personal protective equipment, and other Covid-19 pandemic-related purchases,” giit ni Rodriguez.

“The PS-DBM has also been hounded by allegations of improper procedure and overpriced acquisitions,” dagdag pa ng mambabatas, kasabay ng panawagang pagbuwag sa nasabing tanggapan.

Pasok din sa panukalang batas ang mga kawani ng nasabing tanggapan na aniya’y dapat lamang bigyan ng separation at retirement benefits gamit ang mga umiiral na batas ukol sa karapatan ng mga empleyado ng gobyerno.

Marapat din aniyang ibalik sa national treasury ang lahat ng pondong inilipat ng iba’t ibang ahensya sa PS-DBM para sa pagbili ng mga medical supplies.

“There would be a transition period of one year, during which the budget department’s procurement arm would make an inventory of purchased supplies and deliver these to the agencies. No further procurement by PS-DBM would be allowed,” ayon pa sa panukala.

Samantala, sinabi ni House committee on good government and public accountability chair Michael Aglipay na tatapusin na nila ang imbestigasyon sa kwestiyonableng transaksyon ng PS-DBM sa Pharmally kaugnay ng mga medical supplies nitong nakaraang taon.

Hindi na din ani Aglipay dapat pang pahabain ang pagdinig, sabay kastigo sa Senado na umano’y agresibo lang sa tuwing malapit na ang halalan. (BERNARD TAGUINOD)

WALA pa ring katiyakan kung si Senador Manny Pacquiao na nga ang magiging presidential candidate ng ruling party PDP-Laban na mayroong dalawang paksyon – ang isa ay pinangungunahan ng mambabatas habang ang isa ay pinangungunahan ni Energy Secretary Alfonso Cusi.

Ang pahayag na ito ni Sec. Roque ay tugon sa anunsyo ni Pacquiao ukol sa kanyang Eleksyon 2022 presidential bid.

“Karapatan po niya tumakbo,” ayon kay Sec. Roque.

“Pero hindi ko po alam kung ano ang magiging desisyon ng Comelec (Commission on Elections) kung siya ang puwedeng magdala ng pangalan PDP-Laban sa eleksyon,” dagdag na pahayag nito.

Ang PDP-Laban Cusi faction, na sinusuportahan ni Pangulong Rodrigo Duterte, na umuupo bilang party chairperson, ay hiniling na sa Comelec na ideklara ang Pacquiao faction na illegitimate.

Isa si Sec. Roque sa mga senatorial bets ng PDP-Laban Cusi faction para sa Eleksyon 2022.

Subalit, iginiit ni Pacquiao na nananating sila ang lehitimong PDP-Laban group kasama ang anak mismo ng founder ng partido na si Sen. Koko Pimentel.

Ang parehong paksyon ay nagpahayag na ang pagsasagawa ng “illegal” assemblies ay hindi awtorisado ng party leadership. (CHRISTIAN DALE)

INAPRUBAHAN na ni Pangulong Rodrigo Roa Duterte ang pagsasagawa ng pilot face-to-face classes.

Sa regular press briefing ni Presidential spokesperson Harry Roque ay inanunsiyo ni DepEd Secretary Leonor Briones ang gagawing pagsisimula ng face-to-face classes na lilimitahan mula sa 100 paaralan.

Base sa guidelines , maisasagawa lamang ang pilot face-to-face kung papasa sa safety assessment ng Deped ang area kung saan gagawin ang klase.

Kailangan din aniya na may pahintulot mula sa LGU at written consent mula sa mga magulang ng mga estudyanteng lalahok sa face-to-face classes.

Sinabi ng Kalihim na magiging limitado ang kapasidad ng mga estudyante para sa naturang set up.

Sa Kindergarten ay 12 learners lamang ang lalahok habang ang nasa Grade 1 to 3 ay kailangang 16 lamang at ang mga nasa hanay naman ng technical o vocational learners ay lilimitahan sa 20.

Inaasahang sisimulan ang pilot testing ng face-to-face classes “in 2 months time.”

Pang-alis ng takot

Ikinatuwa naman sa mababang kapulungan ng Kongreso ang go signal ni Pangulong Duterte na simulan na ang pilot test sa face-to-face classes dahil isang hakbang umano ito para matuto ang tao na mamuhay sa gitna ng pandemya at pang-alis na rin sa takot sa COVID-19.

Gayunpaman, sinabi ni House committee on constitutional amendment chairman Alfredo Garbin na kailangang tiyakin na bakunado muna ang mga estudyante na papayagang dumalo sa face-to-face classes kasama na ang kanilang mga guro, school personnel at maging ang mga driver ng mga school bus.

“Anything less would be unsafe for students, teachers, and their families,” ayon sa mambabatas at kailangang magtakda aniya ng panuntunan ang Commission on Higher Education (CHED) at Department of Education (DepEd) para matiyak ang kaligtasan ng lahat sa loob ng school campus.

Sakaling simulan na aniya ang pilot testing ay unahing papasukin ang mga senior high school na edad 17 hanggang 18 sa basic education bago ang mga lower grade.

Nauna nang sinabi ni ACT party-list Rep. France Castro na nagagastusan nang husto ang mga public school teacher sa blended learning kumpara sa face-to-face classes dahil mula sa sariling bulsa galing ang ibinabayad ng mga ito sa internet. (CHRISTIAN DALE/BERNARD TAGUINOD)