NASA Manila Doctor’s Hospital si Senador Leila de Lima matapos umano itong makaranas ng mild stroke.

Nitong Sabado nag-umpisa ang iginawad ng Muntinlupa Regional Trial Court Branches 205 at 256 na tatlong araw na medical furlough sa senador.

Batay sa pahayag ni Dr. Meophilia Santos-Cao, posibleng dumanas ng mild stroke ang mambabatas matapos itong makaranas ng matinding sakit ng ulo at panghihina.

“The examination by Dr. Santos-Cao left an impression that Accused De Lima experienced a Transient Ischemic Attack (mild stroke), hence the urgent and extremely important need to rule out a cerebrovascular accident,” nakasaad sa motion for medical furlough ng senadora.

Sa rekomendasyon ng doktor, kinakailangang sumailalim sa Magnetic Resonance Imaging (MRI) at iba pang pagsusuri ang mambabatas na hindi magagawa sa PNP General Hospital dahil sa kawalan ng equipment.

Samantala, kinumpirma ni Atty. Fhillip Sawali, Chief of Staff ni de Lima na batay sa swab test result, negatibo sa COVID-19 ang mambabatas. (DANG SAMSON-GARCIA)