DPA ni BERNARD TAGUINOD

NAHIHIYA ako sa mga dayuhan na matatas magtagalog kapag may mga kababayan tayong pa-Ingles-Ingles dahil mas Pinoy pa ang mga dayuhang ito kaysa kanila.

Hindi ko na itinutuloy ang pagbabasa sa mga artista na kesyong si ganitong artista ay mas magaling magsalita sa Ingles kaysa Tagalog dahil gumuguho ang aking paghanga sa kanila.

Hindi na nahiya ang mga ito sa mga tulad ni Sandara Park na dugong Koreana, tumira sa Pinas, sumikat sa Pinas pero kapag nasa Pilipinas o kahit nasa Korea siya, hindi mo siya maririnig na nag-i-Ingles kundi purong Tagalog ang salita kapag may mensahe sa Pinoy fans.

May mga ambassador din tulad nina US Ambassador to the Philippines MaryKay Loss Carlson at Japan Ambassador Koshikawa Kazuhiko ang nagpo-post sa kanilang twitter account ng Tagalog pero ang ilan sa mga kababayan natin ay pa-Ingles-Ingles.

Karaniwan na sa mga artista na kapag iniinterbyu ay Ingles ang sagot kahit Tagalog ang tanong. Akala siguro nila kapag nag-Ingles na sila ay magaling na sila at simbolo ‘yun ng kanilang katalinuhan. Ugh.

Hindi nila alam, marami ang mga naasar sa kanila dahil kung pakikinggan mo naman ang kanilang Ingles ay baluktot at walang direksyon, putol-putol at halatang pinipilit lang…umayos nga kayo.

Para bang ikinakahiya niyo ang sariling wika niyo. Hindi na kayo natuto sa mga aral ng kanta ni Heber Bartolome na nagsasabing “Mayro’ng isang aso, daig pa ang ulol.

Siya’y ngumingiyaw, hindi tumatahol. Katulad ng iba, pa-Ingles-Ingles pa, na kung pakikinggan, mali-mali naman,’Wag na lang”.

Sa ngayon, ang mga bata, lalo na ‘yung mga mula sa nakaririwasang pamilya ay bihira na ang matatas mag-Tagalog. Naunawaan ko naman ‘yun dahil natuto sila ng Ingles sa kanilang mga pinanonood sa telebisyon.

Pero alam niyo ba na gumagastos ang mga magulang ng mga ito dahil kailangan nilang magpa-tutor sa Filipino dahil karaniwan sa mga ito ay mababa ang grado sa Filipino subject?

Maraming magulang ang hindi natutuwa dahil gastos ito sa kanila pero wala silang magawa dahil naimpluwensyahan ang kanilang mga anak sa mga pinanonood nila sa telebisyon.

Kaya karamihan sa mga bahay ngayon ay may utos sa mga yaya na kausapin ng Tagalog ang mga bata upang magiging matatas silang magsalita ng Tagalog at hindi puro Ingles dahil Pinoy tayo.

Pero ‘yung mga matatanda na at mga sikat pa na tinatanong sa salitang Tagalog ay Ingles na sinasagot, nakasusuka. Ang tatanda na hindi pa rin marunong magsalita ng sariling wika.

Ito ang mga tinawag ni Gat. Jose Rizal na mga “malansang isda dahil hindi marunong magmahal sa sariling wika”.

Kung sariling wika ay hindi n’yo kayang mahalin, paano niyo mamahalin ang bansa n’yo, hindi ba?