KAPWA nakaalerto ang buong pwersa ng Armed Forces of the Philippines at Philippine National Police kasunod ng pag-aresto kay dating Pangulong Rodrigo Roa Duterte sa bisa ng warrant of arrest na inilabas ng International Criminal Court.

Ayon sa militar at pulisya, generally peaceful ang sitwasyon ng bansa matapos ilipad patungong The Hague, The Netherlands si dating Pangulong Duterte.

Ayon kay Col. Francel Margaret Padilla, ang tagapagsalita ng AFP, “While the security situation remains stable, the AFP is actively monitoring developments and is prepared to respond appropriately to any threats to peace and order. We assure the public that we maintain a high state of readiness”.

Kasabay nito, pinabulaanan ng AFP na may naging epekto sa hanay ng mga sundalo ang nangyari.

“Speculations of military action or unrest has no basis. We remain to be solid and professional, unequivocally committed to the chain of command and the democratic institutions of the Philippines,” ani Col. Padilla.

Kinumpirma naman ng PNP na maayos ang sitwasyon sa bansa matapos maaresto si Duterte dahil sa kanyang kinahaharap na kasong “crimes against humanity” sa International Criminal Court (ICC).

Si Duterte ay lulan ng chartered jet at tumulak pa-Netherlands dakong alas-11:03 ng gabi noong Martes kasama si dating Executive Secretary, Atty. Salvador Medialdea.

Kasunod nito, tiniyak ni PNP chief, Police General Rommel Francisco Marbil na tuloy-tuloy sa pagmo-monitor at pagbabantay ng Pambansang Pulisya sa posibleng mga kaganapan o kilos-protesta matapos maaresto ang dating pangulo.

Ani Marbil, nananatiling under control ang sitwasyon ngayon sa buong bansa.

Magugunitang nitong Martes, itinaas sa heightened alert ang status sa buong bansa bilang bahagi ng standard security measures at naka-deploy ang mga pulis sa key areas at may PNP units na handang magresponde kung kinakailangan. (JESSE KABEL RUIZ)