BILANG bahagi ng selebrasyon ng National Women’s Month, inaprubahan ni Quezon City Mayor Joy Belmonte ang ordinansa na naglalayong bumuo ng council para matiyak ang implementasyon ng Republic Act 10364 o ang Expanded Anti-Trafficking in Persons Act of 2012.

Nilagdaan ni Belmonte ang Ordinance No. 2999 S-2020, o ang Quezon City Anti-Trafficking in Persons Ordinance Act, para mapagtuunan ng pansin ang problema sa ‘trafficking in persons, especially women and children, at the local level through policies and programs to prevent, protect and rehabilitate trafficked persons’.

Ang ordinansa ay ipinakilala ng mga konsehal na sina Lena Marie Juico, Shaira Liban, Peachy de Leon, Marra Suntay, Diorella Maria Sotto-Antonio, Eden Delilah Medina, Donato Matias at Freddy Roxas.

“Sa pagdiriwang natin ng Buwan ng Kababaihan, mahalagang mapagtuunan natin ng pansin ang kanilang kapakanan, kalusugan at kaligtasan,” ani Belmonte.

“Through this, we hope to strengthen the city government’s various efforts to combat trafficking in persons, which victimizes mostly women, and to provide needed assistance to the victims,” dagdag pa niya.

Nakasaad sa ordinansa ang mandato na pagbuo ng Quezon City Council on Anti-Trafficking (QCCAT), na magsisilbi bilang pangunahing armas ng local government para matiyak na tamang naipatutupad ito kasama ang RA 10364.

Ang QCCAT ay binubuo ng City mayor bilang chairperson, vice mayor bilang co-chairperson, at ang head ng Social Services Development Department (SSDD) bilang vice-chairperson.

Ang chairpersons ng Committees on Women, Family Relations and Gender Equality, Children’s Affairs, Social Services, at Public Order and Safety ay mga kasama namang bilang mga miyembro, gayundin ang mga presidente ng Liga ng mga Barangay at QC Pederasyon ng Sangguniang Kabataan.

Kabilang din sa mga miyembro ang heads ng City Planning and Development Office, Business Permits and Licensing Department, Department of Public Order and Safety, Public Employment Services Office, Barangay and Community Relations Department, City Legal Department, Quezon City Health Department, Quezon City Protection Center, Gender and Development TWG Office, Education Affairs Unit at City Tourism Department.

Ang superintendent ng Schools Division Office, district director ng Quezon City Police District, at kinatawan ng bawat isa mula sa accredited women, children, at OFW non-government organizations ay tatayo rin bilang mga miyembro.

Sila ay naatasan na magtipon nang regular kada quarter ng taon, o madalas kung kinakailangan para magtrabaho sa pagbuo ng komprehensibo at pinagsamang programa para pigilan at masawata ang human trafficking.

Ang council ay nakamandato rin para ipatupad ang rules and regulations bilang kinakailangan para sa epektibong implementasyon ng anti-trafficking law, kasama pa ng iba ng duties and responsibilities.

Isang QC Joint Task Force Against Trafficking in Persons (QJTFATP) ang binuo para makipag-ugnayan sa lahat ng pagsisikap sa pagsasagawa ng surveillance, investigation at rescue operations ng trafficking cases. (JOEL O. AMONGO)