QUEZON – Patay ang isang farm owner makaraang barilin ng isa sa dalawang lalaking nag-a-apply na trabahador sa kanyang bukid sa bayan ng Infanta sa lalawigang ito, noong Martes ng gabi.

Kinilala ang biktimang si Salvador Recto Lorella, 38, residente ng Barangay Magsaysay.

Ayon sa ulat ng Infante Police, dakong alas-7:40 ng gabi nang dumating sa bahay ng biktima ang dalawang hindi kilalang mga suspek.

Hinanap ng mga ito ang biktima at sinabi sa misis nito na mag-aaplay sila bilang magtatabas sa kanilang bukid.

Ngunit nang lumabas ang biktima, sinalubong ito ng mga putok ng baril.

Mabilis na tumakas ang mga suspek habang isinugod sa ospital ang biktima ngunit idineklarang dead on arrival ng doktor.

Pinaghahanap pa ng mga awtoridad ang dalawang suspek at inaalam ang motibo sa krimen. (NILOU DEL CARMEN)