“EXTREMELY poor choice”, ang paglalarawan ni Gabriela party-list Rep. Arlene Brosas sa pagtatalaga ni Pangulong Ferdinand “Bongbong” Marcos Jr., kay Larry Gadon bilang presidential adviser on poverty alleviation.

Ayon sa mambabatas, seryosong opisyal ang kailangan sa nasabing posisyon para maiangat sa kahirapan ang mga Pilipino subalit si Gadon ang pinili ng Pangulo na isang indikasyon na hindi sineseryoso ng gobyerno ang nasabing problema.

“Lawyer Larry Gadon, who is known for his vulgar language and disbarment cases, as Presidential Adviser for Poverty Alleviation reflects the administration’s clownish approach in addressing hunger and poverty in the country,” ayon pa kay Brosas.

Si Gadon ay isa sa mga kontrobersyal na abogado sa bansa na dalawang beses nang sinuspinde ng Korte Suprema dahil sa kanyang foul language.

Isa rin umanong certified red-tagger si Gadon matapos akusahan ang mga sumusuporta sa kanyang disbarment case bilang New People’s Army (NPA) Coddler at nambastos sa isang babaeng journalist.

“Gadon is an extremely poor choice for a public position that requires serious and diligent work, especially as more than half of Filipinos rate themselves as poor,” ayon pa kay Brosas.

Wala rin umanong karapatan si Gadon na tumanggap ng sahod mula sa sambayanang Pilipino dahil sa kanyang mga asal subalit ang higit na nakadidismaya, ayon kay Brosas, ay hindi ito kwalipikado sa nasabing posisyon.

Si Gadon, ayon kay Marcos Jr. ay may mahalagang papel sa pagbibigay payo ukol sa estratehiya at polisiya na naglalayong labanan ang kahirapan at paghusayin ang buhay ng nabibilang sa “most vulnerable sectors” ng lipunan.

“His wealth of experience as a corporate executive and legal counsel in diverse sectors, including manufacturing, information technology, realty development, healthcare, resorts and hotels, construction, and trading, will contribute to the formulation of innovative and sustainable poverty alleviation strategies,” ayon sa Malakanyang. (BERNARD TAGUINOD/CHRISTIAN DALE)