ISINUSULONG ni Senador Alan Peter Cayetano ang panukalang Child Tourist Safety Act o “Sandy’s Act” upang maprotektahan ang mga bata sa mga pasyalan.
Nilagdaan ng senador ang Senate Bill No. 1926 sa ilalim ng Committee Report No. 39 na nag-oobliga sa mga tourism establishment na magpatupad ng mandatory emergency at risk mitigation plans.
“There’s no better gift to people than the Lord’s gift of children. It is our duty to protect them wherever they are,” ani Cayetano.
Nabuo ang panukala matapos ang pagkamatay ng batang si Sandy Garovillas noong Oktubre 2023 matapos matinik ng jellyfish sa isang resort at hindi agad nabigyan ng tamang medikal na atensyon.
Sa ilalim ng panukala, lahat ng tourism establishments—may akreditasyon man o wala—na tumatanggap ng mga bata ay kailangang magkaroon ng Tourism Emergency and Risk Mitigation Plan.
Saklaw din nito ang mga pampublikong pasyalan gaya ng mga dalampasigan, waterfalls at natural parks na pamamahalaan ng mga lokal na pamahalaan.
Inaatasan din ang ilang ahensya ng pamahalaan kabilang ang Department of Tourism, Department of Health, Department of Environment and Natural Resources, Department of the Interior and Local Government, Council for the Welfare of Children at Philippine Statistics Authority na bumuo ng taunang Tourist Safety Risk Map.
142 
