MULING pinatunayan ni Japanese boxer Naoya Inoue kung bakit siya tinawag na “Monster.”
Tatlong beses pinabagsak ni Inoue ang Pinoy challenger na si Michael Dasmariñas para itala ang 3rd round knockout win at mapanatili ang kanyang IBF at WBA bantamweight crowns, Linggo (Manila time) sa Virgins Hotel sa Las Vegas.
Sa opening round, hindi dumidikit ang 28-anyos Pinoy boxer habang tinatantiya naman ni Inoue ang kalaban.
Pagsapit ng second round, nakakita ng opening ang Japanese champion nang makakonekta ng left hook sa ribs ni Dasmariñas, bagsak ang Pinoy matapos ang nasabing round.
Muling bumagsak si Dasmariñas nang masundot sa katawan sa third round, kung saan kitang-kita ang pamimilipit sa sakit ng challenger habang binibilangan ni referee Russell Mora.
Sa ikatlong bagsak, hindi na nagawang tumayo pa ni Dasmariñas, habang itinaas na ni Inoue ang mga kamay bilang selebrasyon sa kanyang ika-18 knockout win sa 21 laban.
Ang oras sa round, 2:45.
“I just wanted to see what he had and what he could take in the first round,” lahad ni Inoue kay ESPN’s Bernardo Osuna. “After that, I was confident that I could take him out.”
Base sa compubox statistics, nakapagpatama si Inoue ng 38-of-112 total punches (34%), kasama ang 31-of-48 power punches (65%). Habang si Dasmariñas ay 12-of-80 (15%) total punches made, 10-of-40 power punches o 25%. Nalasap din ni Dasmariñas ang ikatlong talo sa 34 fights at naputol ang 13 sunod niyang panalo.
Posibleng makasagupa ni Inoue sa susunod ang sinuman sa magwawagi kina world champions Nonito Donaire at JohnRiel Casimero, na maglalaban sa Agosto 14. (VT ROMANO)
147
