INIULAT ni P/Col. Romano V. Cardiño, director ng Zambales Police Provincial Office, ang pagkakabuwag ng kanyang mga tauhan sa isang drug den sa Subic, Zambales.

Ayon sa ulat, nangyari ang insidente noong Abril 15, dakong alas-3:00 ng madaling araw sa Muslim Area, Purok 6B, Calapacuan, Zambales.

Nadakip ng mga tauhan ng Zambales Police ang itinuturing na dangerous drug personalities na sina Jornada Rivera Inuk, 33, kilalang drug den maintainer; Melvin Araneta Tigbe, 33, online seller; Abdulgani Salaman Lamani, 46, group security; Ajirya Saral Ibnohari, 49, female store vendor; Roger Salama Lamani, 33; Jainal Ibnuhali Jilin, 28, helper; Benny Isnani, 40, mangingisda; Robert Nali, 35, store owner; Jeff Pussan, 57, mangingisda, at Raymond Dionisio Echague, 29-anyos.

Isinagawa ang operasyon ng Zambales PPO sa pamumuno ni P/Col. Cardiño, bilang lead unit, kasama ang mga operatiba ng PDEA, Subic MPS, CIDG Zambales, CIDG Olongapo, Zambales PECU, Zambales MARPSTA, 23rd SAC 2SAB PNP-SAF, 305th Manuever Company, 1st PMFC, 2nd PMFC, PDEA K9, SIU-SBMA, PDEG, HPG3 at 25th SAC 2SAB PNP-SAF.

Sa pamamagitan ng social media exploration, nakakalap ng impormasyon ang mga operatiba at natunton ang nasabing drug den sa Zambales Province.

Ang operasyon ay base sa search warrant No. 2021-21 para sa paglabag sa Sec 5, 6, 7 11, 12, 13, 148 at 15 Art 11 ng RA 9165 na inisyu ni Hon. Raymond C. Viray, presiding judge ng RTC Branch 75, Olongapo City, covered with PDEA Control number 1004-042021-0381, laban kay Angelica Arizo y Sahi alyas Ghelly, drug watchlisted sa Zambales PPO.

Nakumpiska ng mga awtoridad sa nasabing operasyon ang 40 gramo ng umano’y shabu na tinatayang P260,000 ang street value.