ARESTADO sa isinagawang “Oplan Pagtugis” ng mga operatiba ng Manila Police District-Delpan Police Station 12, ang isang lalaki makaraang mapatay sa bugbog ang kapwa helper na 57-anyos na lalaki sa Gate 12, Parola Compound, Barangay 20, Tondo, Manila nitong Linggo ng madaling araw.

Idineklarang dead on arrival sa Gat. Andres Bonifacio Medical Center ang biktimang si Manuel Manalo ng Parola Compound habang natimbog naman sa isinagawang follow-up operation ang suspek na kinilalang si Raffy Cabacang, 37, ng naturang lugar.

Base sa ulat ng pulisya, bandang alas-1:30 ng madaling araw nang mangyari ang insidente.

Nagkaroon umano ng mainitang pagtatalo ang dalawa na humantong sa pagbugbog ng suspek sa biktima.

Pagkaraan ay bumagsak na walang malay ang biktima. Agad itong isinugod sa pagamutan ngunit idineklarang dead on arrival.

Agad namang iniutos ni Police Lieutenant Colonel Marlon Mallorca, station commander, na tugisin ang suspek hanggang sa ito’y madakip. (RENE CRISOSTOMO)