PATAY ang isang 46-anyos na ginang sa nangyaring sunog sa Navotas City noong Biyernes ng umaga na nag-ugat sa paglalaro umano ng posporo ng mga bata.

Kinilala ng Bureau of Fire Protection (BFP) ang biktimang si Madel Santos, 46-anyos.

Umabot sa unang alarma ang sunog sa residential area sa Riverside, Brgy. San Rafael Village dakong alas-7:38 ng umaga na umabot sa ikalawang alarma dakong alas-7:46 ng umaga.

Idineklara namang under control ng mga bumbero ang sunog dakong alas-8:38 ng umaga at ganap na naapula alas-9:03 ng umaga.

Tinatayang 169 pamilya ang naapektuhan ng sunog na tumupok sa tinatayang P100,000 halaga ng mga ari-arian.

Ang mga residenteng naapektuhan ng sunog ay pansamantalang tumutuloy sa San Rafael Village Elementary School at pagkakalooban ng kanilang pangunahing pangangailangan ng City Social Welfare Office. (ALAIN AJERO)