KAPWA namatay ang live-in partners makaraang saksakin at paluin ng martilyo sa loob ng kanilang bahay sa Sta. Ana Manila noong Sabado ng umaga.

Kinilala ang mga biktimang sina Elenita De Luna, 56, at Rodrigo Belocora, 68, kapwa residente sa naturang lugar.

Base sa ulat ni Police Captain Dennis Turla, hepe ng Manila Police District – Homicide Section, nadiskubreng patay na ang dalawa sa loob ng kanilang bahay dakong alas-6:40 ng umaga.

Habang nakatakas naman ang umano’y suspek sa krimen na si Vanjo Tullalian, 32, at isa pang kasama nito.

Ayon sa isang testigo, kumakatok siya sa pinto ng bahay ng mga biktima ngunit walang sumasagot kaya nagpasya siyang buksan ito at nagulantang nang madiskubreng patay na ang mga ito.

Nadiskubre ng mga awtoridad sa pinangyarihan ng insidente ang duguang patalim at martilyo na pinaniniwalaang ginamit ng mga suspek sa pagpatay sa mga biktima.

Hinihinalang robbery ang motibo ng mga suspek sa krimen. (RENE CRISOSTOMO)