NATANGGAP ng AKOOFW ang isang panawagan ng ating kabayani na isa nang senior citizen.

Siya ay si Tatay Pepito Siaton, 60 taong gulang at kasalukuyang nasa Jeddah Saudi Arabia.

Dokumentadong OFW na nakarating sa bansang Saudi Arabia si Tatay Pepito noong Abril 26,2007. Ngunit sa tagal ng panahon ng kanyang panunungkulan sa kanyang kumpanya, hindi nagtagal ay nagsara ito.

Dahil sa pagsasara ng kumpanya ay tuluyan na siyang naging undocumented at nawalan na ng trabaho at employer.

Doble dagok ang nangyari kay Tatay Pepito, dahil bukod sa kawalan ng trabaho ay inatake pa ito ng mataas na presyon ng dugo at naging dahilan ng pagkaparalisa ng kanyang kalahating katawan.

Hindi pa rito natatapos ang kanyang kalbaryo, dahil matapos na maparalisa, ay nabulag din ang kanyang kanang mata at ang kanyang labis na ikinababahala ay malamang na mabulag na rin ang kanyang kaliwang mata kung hindi ito maooperahan.

Dahil sa kawalan ng regular na dokumento o residency visa, ay hindi ito makapunta sa mga pampublikong ospital para man lamang makapagpa-check up.

Expired na ang lahat ng kanyang papeles pati na rin ang kanyang pasaporte ngunit hindi niya magawang magpa-renew nito dahil sa kanyang kalagayang medikal.

Labis-labis ang panawagan ni Tatay Pepito na tubong Cordova, Cebu na siya ay matulungan ng ating gobyerno upang siya ay makauwi na sa Pilipinas at makapiling ang kanyang pamilya.

Ang AKOOFW ay nanawagan sa Department of Foreign Affairs upang matulungan na maasikaso ang kanyang repatriation.

Sa hanay naman ng Overseas Workers Welfare Administration (OWWA) ay aking hiniling sa ating Welfare Officer sa Jeddah na masuportahan si Tatay Pepito sa kanyang mga pangangailangan katulad ng pagkain at gamot.

oOo

Sa mga nais dumulog at humingi ng tulong sa ating kolum na AKOOFW ay maari kayong magpadala ng inyong email aa drchieumandap@yahoo.com.