TARGET ni KA REX CAYANONG

SA gitna ng patuloy na pakikibaka para sa katarungan at paggalang sa karapatang pantao, isang mahalagang hakbang ang ikinasa ni Senador Robin Padilla sa paghain ng Senate Bill 2547 o mas kilala bilang ang Mohammad Said bill.

Sinasabing layon ng panukalang batas na ito na bigyan ng nararapat na kompensasyon ang mga biktima ng maling pag-aresto at pagkulong dahil sa mistaken identity.

Isa sa mga pangunahing inspirasyon para sa panukalang batas na ito ay ang kaso ni Mohammad Maca-antal Said, isang 62-taong gulang na nabiktima ng maling pagkaaresto noong 2023 dahil sa mistaken identity.

Kahit na napalaya na si Said nitong Pebrero 7, mahalaga pa rin na bigyang-katarungan ang kanyang karanasan at ang mga katulad niyang biktima.

Napakahalaga ng pagtugon sa mga ganitong paglabag sa karapatang pantao, at ang panukalang batas na ito ay naglalayong mabigyan ng tamang kompensasyon ang mga biktima at kanilang pamilya.

Sa pamamagitan ng pagtatakda ng isang Board of Claims, maaaring maibigay ang nararapat na reparasyon sa mga nasalanta ng ganitong uri ng pang-aabuso.

Nararapat lamang na bigyang pansin ng ating mga mambabatas ang mga ganitong isyu upang tiyakin na ang ating justice system ay makatarungan at nagtataguyod ng karapatan ng lahat, anoman ang kanilang katayuan sa lipunan.

Samantala, ang pagsisimula ng construction ng Pambuhan Bridge ay isang magandang balita para sa mga residente ng Camarines Norte, lalo na sa mga apektadong lugar ng pagbaha.

Ang proyektong ito ay nagpapakita ng maayos at epektibong pagtugon sa pangangailangan ng mamamayan, at isang katangi-tanging hakbang tungo sa pag-unlad ng lalawigan.

Kapuri-puri ang inisyatibo ni Senador Padilla sa pagpapalakas ng imprastraktura sa pamamagitan ng pagsuporta sa Pambuhan Bridge. Ang paglaan ng pondo para rito ay nagpapakita ng kanyang malasakit at dedikasyon sa kapakanan ng mga taga-Camarines Norte na pinamumunuan ni Gov. Dong Padilla.

Ang proyektong ito ay hindi lamang magbibigay ng solusyon sa problema ng pagbaha, kundi magbubukas din ng mga oportunidad para sa mas maginhawang pamumuhay at pag-unlad sa lalawigan.

Todong pasasalamat at pagpupugay ang nararapat para kina Gov. Padilla at Senador Padilla sa kanilang pagmamahal at serbisyo sa bayan.