DAPAT nang paspasan ng gobyerno ang pagpasok sa kaban ng bayan ng ­malaking kinikita mula sa electronic – sabong (e-sabong).

Pumapalo sa P1.5 bilyon kada araw ang kita sa e-sabong, ngunit sayang ito kung napupunta lang sa iilang bulsa.

Hindi lingid sa kaalaman natin na pinagkakaabalahan ng mga “lord” sa sugal ngayong matindi ang ­pandemya ng COVID-19 sa bansa ang e – sabong.

Kung ang mga ordinaryong manggagawa ay problemado sa kita dahil sa COVID-19, iba ang mga taong nasa likod ng e-sabong na nagkakamal ng bilyun-bilyong pera.

Ika nga nila, tuloy ang kita, tuloy ang ligaya kahit may COVID-19.

Ang gamit lang ay celphone, laptop at iba pang gadget na may internet connection, solve na ang kitaan sa e – sabong.

Dumagsa sa Facebook ang pag-rerecruit ng mga ahente ng e – sabong.

Matindi pala ang e – sabong dahil umaabot ito sa 12 fights kada oras na P60 milyon ang kita.

Ito ay tumatakbo ng sampung oras kada araw bawat isang operator na P600 ­milyong gross income ang nakakabig niya.

Alang kahirap-hirap ang mga gambling lord sa e – sabong dahil mas matipid pa kaysa sa jueteng.

Hindi na kailangan ng kubrador sa e – sabong.

G-cash lang ang katapat, ligtas pa sila sa hawaan sa COVID-19.

Siyempre, kung ano ang kalakaran sa jueteng, ganu’n din sa e – sabong.

Mayroon ding parte ang ilang opisyal sa mga pamahalaang lokal at mga opisyal ng Philippine National Police (PNP).

Ika nga nila, “spread the sunshine”.

Sa limang kumpanya ng e – sabong, dalawa ang lisensyado ng Philippine Amusement and Gaming Corporation (PAGCOR).

Kaya, wasto lang na siguraduhin ng PAGCOR, sa pamumuno ni Andrea Domingo, na hindi maloloko ng e – sabong operators ang gobyerno.

Dalawa sa limang kumpanya ay ang pag-aari ni Charlie “Atong” Ang na Lucky 8 Star Quest Inc. na operator ng Pitmaster Live Games at ang pag-aari ni Bong Pineda na Belvedere Vista Corporation na ang pangalan ng e – sabong ay “Sabong Express” sa Pampanga.

Iba talaga ang lakas ng dalawang gambling lord na ito kapag sugal ang pinag-uusapan.

Sila palagi ang nasa ­priority list ng gobyerno.

Sabi tuloy ng ating taga-subaybay, hindi lang tubong lugaw ang kita ng dalawa, kundi tubong sugal kasi kumita na sila sa ilegal at kikita pa sa legal na e – sabong.

Kayo na ang maging lord, ‘di ba? Ganoon sila kalakas.

oOo

Para sa suhestiyon at reaksyon, mag-email joel2amongo@yahoo.com, o kaya magtext sa 0919-259-5907.