TINATAYANG mahigit sa P2.4 milyong halaga ng high grade marijuana o kush ma­rijuana na may katumbas na 1,514 gramo, na idineklara bilang “denim jeans”, ang nadiskubre ng mga tauhan ng Bureau of Customs Port of Clark, sa ilalim ng pamumuno ni District Collector Atty. Elvira Cruz.

Sa initial tagging ay may nakitang kahina-hinala ang X-ray Inspection Project (XIP) personnel kaya ang shipment ay idinaan sa K9 sniffing ng Philippine Drug Enforcement Agency (PDEA) K9 Unit na naglabas ng positibong indikasyon sa presensya ng dangerous drugs.

Kasunod nito, isang phy­sical examination ang agad na isinagawa ng nakatalagang customs examiner, sa presensiya ng media at barangay kagawad, at mga kinatawan mula sa Customs Anti-Illegal Drugs Task Force, Enforcement and Security Service, Customs Intelligence and Investigation Service, XIP, at PDEA.

Ang nasabing eksaminasyon ay naging daan sa pagkakadiskubre sa tatlong jog sealed bags na naglalaman ng pinatuyong dahon at fruiting tops ng high grade marijuana.

Dahil dito, ang samples ay dinala sa PDEA para sa chemical laboratory analysis, kung saan ay natukoy bilang tetrahydrocannabinol/marijuana, isang dangerous drug, sa ilalim ng Republic Act (RA) No. 9165 o Comprehensive Dangerous Drugs Act of 2002.

Isang Warrant of Seizure and Detention ang inisyu ni District Collector Cruz laban sa shipment dahil sa paglabag sa Section 118 (g), 119 (d) at 1113 par. (f), (i), at (l)-(3) and (4) ng Customs Modernization and Tariff Act na may kaugnayan sa RA No. 9165.

“The Port of Clark is firm with its anti-illegal drugs campaign. Through the vigilance of our personnel and the constant support of PDEA, we were able to stop various drugs smuggling attempts as evidenced by the port’s series of apprehensions. Rest assured that the Port of Clark will continue to enforce its border security measures,” ani District Collector Atty. Elvira Cruz.

(JOEL O. AMONGO)