INAASAHAN na umano ng Malacañang ang pagbaba ng ranggo ng Pilipinas sa Corruption Perceptions Index (CPI) kung saan bumagsak ang bansa sa ika-120 puwesto mula sa dating ika-114 sa hanay ng mahigit 180 bansa.

Ayon kay Presidential Communications Office (PCO) Undersecretary at Palace Press Officer Claire Castro, inaasahan na ito dahil mismong si Pangulong Ferdinand Marcos Jr. ang nagbukas ng usapin laban sa korupsyon.

“Expected po iyan dahil binuksan po ng Pangulo ang isyu tungkol sa korupsyon. So, kung binuksan ng Pangulo ang korapsyon, magkakaroon ng pag-iimbestiga, at ito po ang ninais ng Pangulo – maimbestigahan,” ani Castro.

Paliwanag pa ng opisyal, sa pagbubunyag ng mga nakatagong anomalya, natural lamang na makikita ang lawak ng problema habang nililinis ang sistema.

“So, expected po talaga na mabubunyag ang korapsyon na naganap noong nakaraan. At sa paglilinis pong ito, makikita po nila ang pagbabago para mas makita nila na pinipigilan at tinatanggal na ang korapsyon sa pamahalaan,” dagdag niya.

Batay sa ulat ng Transparency International, nakakuha ang Pilipinas ng score na 32 na mas mababa sa global average na 42. Mas mababa rin ito ng isang puntos kumpara sa score na 33 noong 2024.

Sa ASEAN ranking, nalagpasan ang Pilipinas ng Singapore, Malaysia, Brunei, Timor-Leste, Vietnam, Laos, Indonesia at Thailand. Mas mababa lamang ang ranggo ng Cambodia at Myanmar.

Ang CPI ay sinusukat ang pananaw ng mga eksperto at negosyante sa antas ng korupsyon sa public sector ng isang bansa.

(CHRISTIAN DALE)