MANILA — Nanawagan si FPJ Panday Bayanihan Party-List Representative Brian Poe na tiyaking madaling ma-access ng mga overseas Filipino workers (OFWs) na napipilitang umuwi dahil sa kaguluhan sa Middle East ang tulong mula sa Assistance to Individuals in Crisis Situations (AICS) ng Department of Social Welfare and Development (DSWD).

Ayon kay Poe, libu-libong manggagawang Pilipino ang apektado ng patuloy na tensyon sa rehiyon, kung saan mahigit isang libong OFW na ang humiling ng repatriation at marami pa ang posibleng sumunod.

“Our hearts go out to every Filipino worker affected by the ongoing conflict in the Middle East. More than a thousand of our kababayan have already requested repatriation, and many more may soon be forced to return home due to circumstances beyond their control,” ani Poe.

Binigyang-diin ng kongresista na sa ganitong mga pagkakataon, mahalagang handa ang mga social protection programs ng pamahalaan upang agad na makatugon sa pangangailangan ng mga Pilipinong nasa krisis.

Ipinahayag din ni Poe ang kanyang tiwala sa kakayahan ng DSWD at sa pamumuno ni Secretary Rex Gatchalian sa mabilis at maayos na paghahatid ng tulong sa mga nangangailangan.

“In times like these, it is important that our government’s social protection systems are ready to respond quickly and compassionately. I have full confidence in the Department of Social Welfare and Development and in the leadership of Secretary Rex Gatchalian, who has consistently demonstrated both competence and commitment in delivering assistance to Filipinos facing crisis,” dagdag niya.

Matagal nang kinikilala ang DSWD bilang isa sa mga pangunahing ahensya ng pamahalaan na nangunguna sa pagtugon sa mga emergency at sa pagbibigay ng agarang tulong sa mga sektor na pinakaapektado ng krisis.

Ayon kay Secretary Gatchalian, maaaring makinabang sa AICS ang mga indibidwal na dumaranas ng krisis anuman ang antas ng kanilang kita. Nagbibigay ang programa ng agarang tulong para sa mahahalagang pangangailangan tulad ng pagkain, pamasahe, gastusing medikal, suporta sa edukasyon, at iba pang agarang pangangailangan.

Para sa mga OFW na mapipilitang umuwi nang biglaan at maaaring may limitadong ipon habang may mga obligasyong pinansyal sa kanilang pamilya, maaaring magsilbing mahalagang pansamantalang suporta ang AICS.

Dahil dito, hinikayat ni Poe ang DSWD na makipag-ugnayan nang mas malapit sa Overseas Workers Welfare Administration (OWWA) at sa Department of Migrant Workers (DMW) upang matiyak na ang mga OFW na darating sa mga paliparan ng bansa ay agad na maipapaalam tungkol sa AICS at madaling makaka-access ng tulong kung kinakailangan.

“Our OFWs did not choose to come home early. They have sacrificed years of their lives working abroad to support their families and contribute to our nation’s economy. The least we can do is ensure that when they return, the full capacity of government is ready to support them,” ani Poe.

Dagdag pa niya, nararapat lamang na ipakita ng pamahalaan ang buong suporta sa mga OFW na matagal nang nagsisilbing haligi ng ekonomiya ng bansa.

“Sa lahat ng ating mga kababayang OFW, alam namin ang inyong sakripisyo, at handa kaming tumulong,” pagtatapos ni Poe.